East Bengal tan chak a ngai

Zaninah Indian Super League khelh a ni dawn a, East Bengal chuan zan dar 7:30 hian Chennaiyin an mikhual dawn - hnehna chan an inbeisei ang.

India coach hlui Stephen Constantine enkawlna hnuaia khel mek East Bengal hian league match li an khelh tawhah vawi khat chiah hnehna an la chang a, an hneh awmchhun hi chak la nei lo NorthEast United (3-1) a an hneh kha a ni.

Highlander an hneh hnuah hian beiseina sang tak nen Kolkata derby an khel a, mahse, ATK Mohun Bagan lakah 2-0 in an mualpho - mahni tawka club lian inti, huhang ngah zet East Bengal hi zaninah an tlawm leh a nih ngat chuan, coach Constantine ban duhna a ri tawh hial ang.

Chennaiyin hi an ropui bik lo - league match thum an khelh tawhah vawi khat chiah an la chak a, vawi khat an tlawm a, vawi khat draw an nei. Zaninah chak an beisei dawn.

South Indian club hian an match hmasa berah sum hmang hnem Bagan an hneh a, mahse, Bengaluru (1-1) inhnehtawkpui zuiin, FC Goa (2-0) lakah an tlawm a, an result hi a chhe tawlh tawlh - team boruak chawi nung thar turin chak an mamawh.

Mizo player tamna ni ṭhin Chennaiyin hian tun season-ah Mizo player kawl an nei lo a, East Bengal-ah defender Jerry Lalrinzuala leh Lalchungnunga te an awm thung a, Kolkata club-ah hmun pawimawh an chang phak - match li an khelh tawhah an la inlan vek.

Jerry hian Chennaiyin aṭanga a professional career ṭanin, tun season ṭan dawna East Bengal a pan hma hian South Indian club tan league match 94 zet a khel hman.

India tana vawi kua inlan tawh Jerry chuan, "Mahni club hlui hmachhawn chu a châkawm duh bik khawp mai," tiin Vanglaini a hrilh a, Chennaiyin lakah chak a beisei ang.