Match hmasa berah Nadal a tla

Pa a nih hnua a match hmasa berah Rafael Nadal a chak lo. Nilaini zan khan Nadal hi Paris Masters second round-ah a inlan a, chak zawk tura rinkai leh ranking sang zawk ni mah se Thomas Paul a ngam lo.

Grand Slam vawi 22 champion tawh Nadal hian set hmasa ber a la, harsa vak loin a tlang dawn niin a lang hman. Amaherawhchu, world number 31 Paul a zam duh bik lo, set a hloh hnuah 3-6, 7-6 (7-4), 6-1 a tho chhuakin hnehna a chang daih.

US Open hnua a match hnihna khel lehtu Nadal chuan, "Ka inkhel leh thei ta hrim hrim kha ka lawm, duhthusama ṭhain khel thei lo mah ila tennis court rah hi chu a nuamin a hlimawm, ka hma hun erawh tunah chuan sawi chian a harsa.

"ATP Finals khelh tur ka la nei, tun hma lama ka la champion ngai lohna a ni a, tun ang dinhmunah chuan beisei neih san ngam a harsa khawp mai. Tun hnai thla nga chhungin a ka inkhel tam lo a, chu chuan tournament khelh chhunah nghawng ṭha lo a nei," tiin a sawi.

Paris Masters hma hian Carlos Alcaraz, Stefanos Tsitsipas, Casper Ruud, Daniil Medvedev, Rafael Nadal leh Novak Djokovic te chu ATP Finals khel turin an tling chiang tawh, hmunruak pahnih la awm hi Felix Auger-Aliassime leh Andrey Rublev ten an hnawhkhat ve leh ta chiah.

Inkhel dangah Auger-Aliassime hian Mikael Ymer 6-7 (6), 6-4, 7-6 (6) in a hneh a, wildcard hmanga inlan Gilles Simon nen an intawng leh ang. Simon hian WTA Finals khelh beisei ve tu Taylor Fritz chu 7-5, 5-7, 6-4 in a hneh a, a beiseina a tihtawpsak.

Seeded pakhatna Alcaraz-a'n a khingpui Yoshihito Nishioka lakah harsatna a tawk lo, vawi 30 ngawt winners vaw chhuak chungin 6-4, 6-4 in hnehna a chang a, world number 1 ni chunga kum tawp hmang turin a dinhmun a sawhnghet zel.