Jabeur a tho chhuak

WTA Finals khelh laiah Ons Jabeur chu chesual nawn thei dinhmunah a ding a, mahse insiamṭha lehin Jessica Pegula chu 1-6, 6-3, 6-3 in a hneh a, semifinal lut turin beiseina a la nei chhunzawm.

Jabeur hian season a hmang ṭha hle, mahse a thiam zual pariat inelnaah hian a match hmasa berah a chak lo. Group match hnihnaah pawh set a hloh hmasa a, set hmasa berah hian game khat chaih a lak avangin a dinhmun a ngaihtuahawm hman.

Mahse, set hnihna aṭangin huaisen takin a rawn tho chhuak a, hun pawimawh laiah a khingpui service chhuhsak ve ve in a chak hram. November 5, Inrinni zingah Maria Sakkari nen an inhmachhawn leh ang.

Kum 28 mi Jabeur chuan, "Set hmasa berah khan a khel ṭha em em a, a ball rawn vuak apiang mai kha dawnsawn a harsa vek. Match hmasa zawka ka chak loh tawh avangin rilru pawh ka chiai hman hle.

"Mahse, rilru fim ka pu lui tlat a, ka chak lo chuan ka tlai thei a ni tih kha ka hria, semifinal luh ngei tuma ka beih hram hramna chu a tawpah ka hlawhtlin pui ta a ni," tiin a sawi a, group stage china tawp mai a tum lo.

Inkhel dangah Maria Sakkari chuan Aryana Sabalenka chu 6-2, 6-4 in a hneh a, player ṭha zual bik pariat inelnaah hian semifinal a inhlangkai der, a match hmasa zawkah Jabeur a lo hneh tawh bawk a ni.

Sakkari chuan, "Set hnihnaah 3-0 in ka hniam hman, a hnuah game khat chauh hloin game ruk ka la thung a, ka thawh chhuah leh danah ka lawm hle," tiin a sawi, season hmasa khan WTA Finals-ah hian semifinal a lo lut tawh bawk.