Rico Lewis chungah Guardiola a lawm

Manchester City tan kum 17 mi Rico Lewis-a'n Champions League-ah goal a khung a, European football inelna sangah hian inkhel bul ṭan hmasak bera goal khung thei naupang ber record a siam.

Lewis hi kum 17 leh ni 346 mi a ni a, tun hma lama record lo siam tawhtu Karim Benzema (kum 17 leh ni 352) chu a khum. Citizens hian Lewis bakah Julian Alvarez leh Ryad Mahrez te goal hmangin Sevilla 3-1 in an hneh.

Group match hnuhnung ber an khelh hmain Man City dinhmun a chiang tawh a, player ṭha ber ber an luh kher a ngai lo. Erling Haaland-a'n mual sir aṭangin a ṭhiante inkhel a lo en a, defender Kyle Walker leh Kalvin Phillips te la inkhel chiah lo mah se an dam tawh bawk.

Man City manager Guardiola chuan, "Lawmman kan pe hran lo ang, lawmman chu a hlawh a hlawh chhuah tur a ni. Season thar inbuatsaihna kan neih lai khan Lewis hian Bayern Munich a hmachhawn tawh.

"Club academy aṭanga player ṭha tak an rawn chhuah hian a lawmawm zual bik ṭhin, ani pawh hi a training ka hmuh ṭhin a nih avangin ka ring ngam a, ṭha taka a khel hi kei chuan mak ka ti hran lo," tiin a sawi.

Lewis hian kum riat mi lek a nih laiin Etihad Stadium hi a pan tawh, a kum la naupang deuh mah se theihna nei sang bik zinga mi a ni a, a club ṭan leh ngainat tak City tan hian sulhnu duhawm zawk la hnutchhiah thei tura ngaih a ni.

Group G inkhel dangah Borussia Dortmund leh FC Copenhagen te 1-1 in an inhnehtawk a, Bundesliga club hi pahnihna ni chungin last 16-ah an lut ve bawk. Spanish club Sevilla erawh Eurropa League last 32 chin aṭanga an khelh a ngai dawn.

Pep Guardiola enkawl City hian Inrinni zan dar 8:30 hian Premier League-ah Fulham an hmachhawn dawn, champion lai ni mah se Arsenal hnuaiah an awm mek a, nomawi humhim turin inthlahdah a thiang lo - striker ṭha Haaland hoin an khelh theih tawh a rinawm.