Rilru tih hahdam a ngai - Quartararo

Pathianni zanah Valencia MotoGP an tlan dawn, bike intlansiakna sang ber hi season kharna a nih bakah champion tur tih chianna a ni nghal dawn a, boruak a sang dawn hle.

Yamaha rider Quartararo hian hun rei tak chhung hma a hruai a, mahse season tawp lamah talbuaiin Francesco Bagnaia lakah a dinhmun a hloh. Tunah chuan Bagnaia hi point 23 ngawtin a phak lo ta a ni.

Valancia GP-ah hian Quartararo tan champion turin chak ringawt a tawk lo, a chunga awm Bagnaia-a'n point hnih aia tam a hmuh loh a ngai, beisei a chauh tawh hle, chutih rualin intlansiakah chuan point hmu miah lo a chetsual theih a ni ve bawk.

Kum 23 mi Quartararo chuan, "World champion nih chu a harsa tawh dawn, chutih rualin inelna kan tlan zawh hma chuan beidawn a thiang lo. Intlansiak hnuhnung berah hian 100% rilru ka pe dawn.

"Ngaihtuah nasat lutuk vanga chak theih ngawt a ni lo tih ka hria, chuvangin rilru hahdam leh engthawl taka awm ka tum zawk. Result chu a pawimawh ngei mai, chumi rual chuan nuamti taka intlansiak ka tum ang," tiin a sawi.