Tlai dar 3:00-ah MPL6 quarterfinal! Ramhlun North Vs Chanmari FC

Mizoram Premier League champion lai Chanmari FC-in knockout stage lut turin turin point thum bak an mamawh tawh lo. Vawiin tlai dar 3:00 hian Chanmari FC leh Ramhlun North an inkhel dawn a, semifinal khel tur zawnna a nih avangin quarterfinal ang hiala sawi theih a ni.

Chak a pawimawh
Chanmari FC-in an match hnuhnung bera Bethlehem Vengthlang FC an hneh avangin dinhmun derthawng aṭangin dinhmun duhawm takah an inhlang chho a, amaherawhchu panganaa awm Ramhlun North nena an inthlauhna hi point thum a nih avangin an chak lo a nih chuan rilru hahdam takin match hnuhnung ber an khel lo ang.

Ramhlun North tan erawh draw game khelh a thiang tawh lo a, chak ngei ngei a ṭul tawh. Samson Ramengmawia hoten an match hnuhnung berah an huaisenna lantirin Chhinga Veng lakah point khat an sual chhuak.

Chhingcows lakah Ramhlun North an la tlawm ngai lo a, Chanmari FC erawh MPL hmahruaitu lakah hian tun season-ah ringawt vawi li an chak lo.

Amaherawhchu team dang nena an inkhelhna aṭangin teh tur a ni lo a, an pahnih inkhelhna a pawimawh. Chanmari FC hian phase 1-ah Ramhlun North hi 2-0 in an hneh tawh a, an inthlauhna hi point thum chauh a nih avangin tun ṭuma an inkhelhna hi a pawimawh khawp ang.

Rosanga a dam?
Chanmari FC-in defender pawi­­mawh C. Lalrosanga'n inhliam vanga rei tak a chawlh hnuah inkhel bul a la ṭan hmel loh a, amaherawhchu Lunglei tlangval hi a dam leh tawh avangin bench-ah a ṭhu tawh thung ang.

H. Vanlalthlanga tan player thar MC Malsawmzuala a khel ṭha chho a, Siaha tlangval hi squad tichhahtu satliah ni loin team chakna a ni. Dinthar FC forward hlui MC-a bakah Chanmari hian Nigerian Emmanuel Chijioke Igwebuik te an kawl a, season ṭantirh ai chuan an squad a ṭha tawh zawk.

Chanmari FC coach Thlanga chuan, "Ramhlun North nen hian kan intluktawk a, team vannei zawk an chak ang. A vannei zawk nih kan tum ang," tiin chak an tum thu a sawi a, Bethlehem Vengthlang aṭanga an lakluh B. Zoramthara chu a fak tel bawk. College Veng tlangval Thara hian Chanmari tana a match hmasa berah BVT lamah goal a khung nghal.

Game pawimawh ber
Ramhlun North player-te Chanmari FC hmachhawn turin an dam kim vek a, match hnuhnung bera man of the match Liberian defender Korhena A. Boekai leh Ghanaian midfielder John Kweku Ampong ten hmuh pawimawh an chang ang a, Lalrinfela leh Lalliansanga te nena an goal nawr chu a na khawp ang.

Samson Ramengmawia chuan, "Chak tumin kan khel dawn. Kan game pawimawh ber ang hiala sawi theih a ni a, player-te pawh semifinal khelh a la beisei theih avangin an phur hle. Veng chhung mipui ṭawiawmna ṭha kan mamawh ang," tiin inkhel pawimawhah supporter puihna a sawm.