BVT hawi lam hriat zan

Zanin dar 7:30 hian Lammualah Bethlehem Vengthlang FC-in Mizoram Premier League Season 6 hmahruaitu Chhinga Veng an hmachhawn dawn a, BVT tan inkhel pawimawh a ni.

Chhingcows-in point 27 an hmu tawh a, pakhatna dinhmun nemnghet turin chak an la ma­mawh. BVT pawhin semifinal beiseina chhi nung turin point thum tho an mamawh a, an khingpui aiin an point mamawhna hi a sang zawk.

Chak tumin le...

Chhinga Veng coach Lalsang­zuala Hmar chuan, "A chung bera kan dinhmun kan sawhnghet theih laia player khek chu a dik lo ang. Kan ṭhat dan berin kan khel dawn a, player duhsak kan nei dawn lo," tiin semifinal lut tawh mah se inthlahdul an tum lo.

Chhingcows hian Inrinni khan Assam Rifles nen friendly match an khel a, 8-0 in an sawp. He inkhelah hian Lalrammuanpuia'n goal hnih a khung bakah Lalkhawpuimawia, Laldingngheta, Laldampuia, Joy Mrong Kharraswai, Malsawmfela leh Hmingthanmawia ten goal khat ṭheuh an khung.

Hemi chungchang hi sawiin Sanga chuan, "Goal riat kan khung chuan kan khingpui chu an nem tih chu a lang a, amaherawhchu inrintawkna kan neih phah khawp ang. Malsawmfela hian tun hnaiah goal a khung lo a, Assam Rifles laka goal a khung avangin goal hmaah a hriam phah ang," tiin an ṭhat phat a rin thu a sawi.

Chhinga Vengin I League cham­pion Aizawl FC an hneh loh hnuah Ramhlun North nen an inhnehtawk a, tun hnaia an result ṭha lo siam ṭha turin BVT hneh hi a pawimawh.

BVT an fimkhur

Bethlehem Vengthlang FC tana chanchin lawmawm chu Chhingcows hmachhawn turin an dam kim a, amaherawhchu an match hnuhnung bera an elpui Chanmari FC an hneh loh avangin insiamṭhat erawh an mamawh hle.

BVT coach Benjamin Lal­hriatpuia chuan, "Dinpuia'n hremna a hmang zo a, tlarhnung a phui phah sawt ang. Kan mu tanna lai chu goal khung hi a ni a, Chanmari FC lakah pawh khan kan chance ṭha neih chu khung ila result a danglam thei ang. Tunah hian kan khelh dan phung kan thlak hret a, Chhinga Veng hi an chak lohna taka vuak let kan tum a ni," tiin Vanglaini a hrilh.

Bethlehem Vengthlang tan semifinal kawng a la inhawng a, hei vang hian an veng mipui pawhin an ṭawiawm ṭhat a ṭul ta hle.

BVT tlangval Benja chuan, "Chhinga Veng goal nawr hi a na a, tlarhnung lamah kan fimkhur a ṭul dawn. Game plan fel tak kan nei a, tuna kan mamawh chu veng mipui ṭawiawmna an ni. Mipui thawm a ṭhat chuan player-te pawh an khel ṭha ṭhin a ni," tiin inkhel en turin mipui a sawm.