100% fit hma ka inkhel lo ang - Murray

World number 1 hlui Andy Murray chuan nakkum Janaury thlaa khelh tur Brisbane Tournament-ah inlan theih a beisei thu a sawi a, chutihrualin a khel bawr na chu a dam fel vek hma chuan inelna hmachhawn a tum loh thu a sawi chhuak.

Britain tlangval Murray hian July thlaa khelh Wimbledon hnuah tournament a la khel leh lo a, Thawhlehni khan Roger Federer nen charity match khelin 6-3, 3-6, 10-6 in a chak lo zawkah aṭang. Kum 30 mi Murray hian grass court inelna liana Sam Querrey a hneh loh hnu a match hmasa ber a khel ve leh chiah a ni.

Grand Slam vawi thum champion tawh Murray hi hliam vanga a inkhelh theih loh rei tawh avangin ranking-ah pawh 16-naah a tla hniam tawh, Murray chuan, "Wimbledon tawp lam leh US Open inbuatsaih hun laia ka dinhmun nena khaikhin chuan tunah hian ka ṭha tawh hle," tiin a dam tawh thu a sawi.

Murray hian ATP Finals khel thei dawn lo mah se hmasawn tumin kumin kum tawp lam hian Miami lamah full training a nei chhunzawm dawn a, season hawn nan hard court tournament lamah chet nat nghal a tum hle.

A rawn kir hun tur chung­chang sawiin Murray chuan, "Ka inkhelh miau loh avangin ranking chu a hniam zel tur tih chu a chiang, ka rawn kir theih hunah chuan ṭha taka khel thei turin training ka nei ngawrh chho dawn a, phur luat tuk avang erawh chuan ka inkhel hmanhmawh lutuk lo, 100 fit ka nih hunah chiah tournament ka khel ang," tiin a sawi.