World Cup zawha chawl tur Koscielny

Arsenal defender Laurent Koscielny chuan nakkuma FIFA World Cup khelh zawh hnuah ram tana inkhelh a chawlhsan tur thu a sawi. Russia-a inelna lian a zawh hnuah chuan France jersey a ha chhunzawm tawh dawn lo tihna a ni.

Kum 32 mi Koscielny hian 2010 aṭang khan an ram senior team tan a khel ṭan a, ram tan hian match 49 a khel tawh. Les Bleus hian Zirtawpni zan dar 1:30-ah Wales chu friendly match an khelhpui dawn a, Koscielny tan match 50 khelh tlin theihna tur hun a ni ang.

Euro 2016-ah khan Koscielny hi final an luh theih nan player pawimawh a ni a, nakkuma khelh tur FIFA World Cup qualifier match 10 an khelh zinga match riatah chuan minute 90 a khel a, player pawimawh berte zinga mi a ni phak.

Gunners defender Kosciel­ny chuan, "Thil engkim hian tawp hun a nei vek a, nakkuma World Cup kan khelh zawh meuh chuan kum 33 ka hnaih tawh hle ang, ka tan chawlh a hun dawn tihna a ni. Tunah hian France tana ka theihna zawng zawng hlan turin thla ruk vel hun ka la nei," tiin a sawi.