Ṭha takin ka lo kir leh ang - Suarez

Barcelona forward Luis Suarez chuan inter­na­tional break aṭanga a kir hunah a ṭhat dan bera a khelhchhuah leh tur thu a sawi. Kum 30 mi Suarez hian tun season-ah Barca tan match 14 khel tawhin goal thum chiah a la khung - sawisel a tawk nasa hle.

Season ṭan tira a khup hliam vanga chawl mek striker hian international break hlanin ram tan match a khel dawn lo a, kar hnih zet chawlhna hun a neih phah dawn. Liverpool striker hlui chuan, "Chawlh hahdamna hun kar hnih ngawt ka nei dawn a, uluk leh ṭha taka ka inenkawl hnuah chuan ka ṭhat dan berin ka lo kir leh ang," a ti.

Suarez chuan, "A pawi­mawh ber chu natio­nal team leh club nena inremna siam hi a ni a, Poland leh Austria nena friendly match kan khelh tur hi match pawimawh ber a nih loh avangin chawlh hi ka tan a ṭha. Ka khup hliam vangin hrehawm ti takin khel hran lo mah ila hlauhthawnna hi chu a awm reng a, mah se uluk taka enkawlna leh chawlh hahdamna hun pek ka nih hunah chuan ka zia tawh khawp ang," tiin Catalan club tana goal tam zawk khung a la tum.

Barcelona tan Suarez-a'n beisei la phak lo mah se Catalan club hian league match 11-ah tlawm hmel an la hmu chuang lo a, table chung berah awm mekin anmahni hnaih bertu Valencia aiin point liin an sang fal mek.