Hammers boss Moyes a inringtawk

Premier League-a talbuai mek West Ham-in season tawp thlenga an club enkawl turin David Moyes an lalut a, season hman zawh taka Sunderland relegate puitu boss chuan a chetsual tawhna aṭanga insiamṭha tura a inpeih thu a sawi.

Hammers-in an boss thar atan an lakluh thu an puan ruala rin hlawh lo manager chuan, "Kum 20 dawn liam taa Preston aṭanga bul ka ṭan hnuah club panga ka enkawl tawh. Everton-a hun duhawm tak ka hman hnuah Manchester United ka zawm a, ka che chhe lutukah ka ngai lo. Ka chak ber ṭhin tiin ram pawn club Real Sociedad ka enkawl leh bawk.

"Ka hna hnuhnung bera Sunderland ka en­kawlah chiah khan hna ṭha tak ka thawk tawk loah ka ngai a, kha tawnhriat kha nuam ka ti lo takzet. Mahse, ka hming chhiat tawhna siamṭha turin tunah hian ka tui a hal tawh a ni," a ti.

Moyes chuan sawi chhun­zawmin, "A bik takin tunlai football-ah chuan hun harsa tawng lo manager an awmin ka hre lo. Ka hun tawn harsa khan chakna thahrui min pein Hammers hruai chhuak tura mamawhte ka hriatna kawngah min puih ka beisei tlat a ni," tiin a hun thim lo tawn tawh chuan London Stadium-ah a puih theih a beisei.