An khawtualah ngei Joshua ka tukdawl ang - Wilder

WBA leh IBF heavy­weight champion Anthony Joshua-a'n tun hnaia amah chotu WBC heavyweight champion Deontay Wilder chu 'ei zawh tham lek' tiin ngainep viau mah se American boxer a duai lo - Wilder chuan Joshua chu a buzawlah ngei luhchilh a, a hneh tur thu a sawi.

Kum 32 mi Wilder hian Pathianni khan Bermane Stiverne chu a kawng­hren humhim turin round khatna lekah a knockout a, Joshua a cho nghal. British boxer-in Wilder chona a ngaihnep thu a sawi chhuak tawh a, Wilder-a'n ngawih mai mai a tum lo.

Wilder chuan, "Stadium khata in­hnek entu an awm chuan a ropui alawm. Mah­se, boxing hmunpui chu America hi a ni. Chutihrual chuan Joshua hian hmeichhe naupang ang maia a buzawl hi chhuahsan a duh lo a nih chuan Britain a lo kal a, he champion tukdawl tur hian timna ka nei lo," a ti.

American boxer chuan Joshua promoter Eddie Hearn chu "Khawvelah Joshua a ṭha ber" ti chunga British mipui ho dawt hrilhah a puh a, "Eddie hi Joshua ai mah hian a ṭawng tam a ni. Joshua hi champion ropui a ni tak tak tak a nih chuan a buzawl aṭang hian chhuahtir ula, fight hmachhawn tir ta che u. A ṭhat leh ṭhat loh chu in hmu mai dawn alawm. Ka thinlung chuan i ṭha ber alawm tiin min hrilh a, ka lo ni lo a nih chuan ka ṭha ber lo tih min hmuhtir tur hi ka duh a ni," tiin a vaupung a na hle.

Kum 2015 khan Sti­verne-a'n round 12 thleng Wilder a inhnekpui a, Pathian­niah erawh round khat bak a daih lo - Wilder hmachhawn zingah Stiverne tih loh round 12 thleng thei an la awm ngai lo a, vawi 39 inhnek a hmachhawnah 38 a knockout thei.

Mahse, hetihlai hian Joshua promoter Hearn chuan Wilder-a tan a boxer hmachhawn tur chuan Dillian Whyte hmachhawn phawt a ngaih thu a sawi a, Wilder erawh 'B grade fighter' tia a koh Whyte hma­chhawn turin a phur lo hle.

Wilder chuan, "Joshua hmachhawn tur hian Dillian hneh a ngai a nih chuan ka ti mai ang, mah se contract-ah inremna a awm sa tur a ni. A hnungah Lal hmachhawn tur a awm chiang tih ka hriat chauhin a chhiahhlawh chu ka hma­chhawn ang," tiin a sawi.

Joshua leh Wilder hi an inhma­chhawn a nih chuan WBC, WBA leh IBF kawnghren an inchuh dawn tihna a ni a, hnehna chang zawk chuan kum 1988-a WBO din a nih hnuah major title nei vek thei awmchhun leh hmasa ber turin WBO champion Joseph Parker chiah an hmabak tawh ang.