World Cup Playoff Zaninah Croatia leh Ireland ten mikhual thleng dawn
Football inelna lian leh ngaihhlut ber FIFA World Cup 2018 khel turin Europe ram aṭangin hmun ruak pali a la awm a, playoff hmanga hnawhkhah a ni dawn. Zanin dar 1:15 hian Croatia chuan Greece an mikhual dawn; a hun ngaiah hian Switzerland chu Northern Ireland mual Windsor Park-ah an lenglut bawk ang - Pathianni zanah second leg khelh tur a ni ang.
Europe aṭangin Belgium, England, France, Germany (champion lai), Iceland, Poland, Portugal, Russia (thlengtu), Serbia leh Spain te an tling tawh a, group pakuaa pahnihna ṭheuh ten playoff hi an khel dawn, pahnihna zinga record nei ṭha lo ber Slovakia tan erawh playoff khelh theih a ni ve lo.
Zagreb lamah
Croatia hian kum 1998 khan a vawi khat nan World Cup an khel a, an vawi khat inlan hnuah inelna neih a nih apiangin an la inlan phak ziah a, record duhawm tak chhawm nung tur hian Greece chiah paltlang tur an nei tawh.
Zania an inkhelhna tur Stadion Maksimir, Zagreb hi mipuii 35,123 lenna niin mikhual tana inkhelh harsatna hmun a ni. An khelmualah hian an match hnuhnung 18 zetah hneh loh an tawng tawh lo, an hneh loh hnuhnung ber chu Belgium (2013) daih tawh kha a ni, tun
ṭumah pawh hian fans puihna an hmu ṭha dawn a, an zam lo ang.
Vedran Corluka, Mateo Kovacic leh Milan Badelj ten Greece an hmachhawn thei dawn lo a, Zlatko Dalic leh Dejan Lovren te dinhmun a chiang lo bawk; Barcelona midfielder Ivan Perisic leh Juventus hmangtawng Mario Mandzukic te bakah Hoffenheim forward Andrej Kramaric te hi thlamuanpui tham khawp an ni.
Fimkhur a ngai
Football thiam ram tia hriat lansarh an ni ngai lo a, mahse rinkai ni lo chungin kum 2004 khan Euro champion an ni thei. Mahse, nikum khan Faroe Islands an tluk loh avangin Euro an khel phak lo. Tun ṭum qualifier-ah hian an tluk loh chu Belgium an ni a, nakkuma Russia pan an duh a nih chuan khualmuala goal chhuah loh a pawimawh ang.
Thlahtute aṭanga hnam huaisen tia sawi ṭhin Greek club hian player langsar sawi tur an ngah lo a, an innghahna tur chu thawhhona ṭha a ni ang. Ukraine leh Romania hnehin kum 2010 leh 2014 khan playoff an paltlang tawh a, World Cup qualifier hi khualmualah match 13 an khelh tawhah vawi khat chiah an tlawm - khualmuala result ṭha an neihna hi thlamuanpui theih tur pakhat chu a ni.
Ram pahnihte hi tun hma lamin vawi ruk an intawng tawh a, heng zinga match hnih chu friendly match niin a dang erawh qualifier a ni thung. Greece hian record nei ṭha zawkin vawi hnih an chak a, vawi khat an chak lo; match thum dang erawh an inhnehtawk thung.
Kum 32 hnuah
Northern Ireland chuan kum 32 hnua a vawi khat nan World Cup khelh phak an beisei ve leh mek a, an hmaa ding tur hi Switzerland niin anni hian a vawi hnih nan khelh an tum ve thung. Tun hma lamin ram pahnihte hi vawi li chiah an la inkhel a, Northern Ireland hi vawi hnih chak tawhin Swiss lamin vawi khat hnehna an chang ve tawh thung.
Ireland manager Michael O'Neil-a'n striker Jamie Ward leh defender Paddy McNair te a chhawr thei dawn a, Manchester United defender hlui Jonny Evans dinhmun chiang lo mah se West Brom tlarhnunga ban rinawm Gareth McAuley a rawn kir leh tawh avangin a thlamuan thlak hle tura ngaih a ni.
Ram pahnih dinhmun thlirin Swiss hian midfield an thunun zawk theih a beiseiawm. Arsenal midfielder Granit Xhaka leh Stoke City thiampuipa Xherdan Shaqiri te hi hmun awl siamsak zau chi an ni hauh lo ang.