A vawi nga nan Mary Kom a champion
World Champion vawi nga ni tawh MC Mary Kom chuan boxer ṭha chungchuang bik a nihzia lantir nan nimin khan Korean boxer Hyang Mi Kim hnehin a vawi nga nan Asian Boxing Championship-ah India tan 48-kg category-ah gold medal a la.
Vietnam-a final khelhah kum 34 mi Kom-i hian a tir lamah bul ṭan fuh tawk lo deuh mah se round hnihna aṭangin a insiamṭha nghal a, na taka nawr letin hnehna a chang. Indian boxer dang, 57kg category-a inlan Sonia Lather erawh China nula China Yin Junhua lakah a vanduai thung.
Thawhlehni khan Manipuri boxer Kom-i'n Tsubasa Komura chu 5-0 a sawpin final a lut tawh a, gold medal match an khelh hma hian ram tana inhnek a nih thu sawi chhuakin a medal lak chu India ta tur a nih thu a sawi tawh a ni.
Boxing Federation of India president Ajay Singh chuan, "Mary Kom hi kum 34 mi a ni tawh a, fa pathum a nei tawh bawk. Hun rei tak a chawlh hnuah a rawn kir a, ropui taka hnehna a chang leh thei hi India tan chuan a hluin a chhuanawm hle a ni," tiin a sawi.
India tana medal la te
Mary Kom 48 Kg Gold
Sonia Lather 57kg Silver
Shiksha 54kg Bronze
Priyanka Choudhary 60kg Bronze
Sarita Devi 64kg Bronze
Lovlina Borgohain 69kg Bronze
Seema Poonia +81kg Bronze