India-in T20 series an la
India chuan New Zealand nena Twenty 20 series khelh meka an match hnuhnung ber chu Thawhlehni zan khan an khel a, run ruka hnehna changin series chu 2-1 in an la.
ODI series-ah India hian New Zealand hi an lo hneh tawh a, Thawhlehni zanah T20 series match hnuhnung ber khelh hma hian 1-1 a an inhnehtawk avangin boruak a sang hle. Mahse, boruak sang tak hnuaiah Indian bowler ten an hna ṭha takin an thawk a, India an chakpui.
Ruah surin inkhel a tihbuai avangin over riata khelh a ni a, India an bat hmasa zawk. Indian batsman zingah a ding hmasa pali Rohit Sharma (8 runs), Shikhar Dhawan (6), Virat Kohli (13) leh Shreyas Iyer (6) te an talbuai a, Manish Pandey (17) leh Hardik Pandya (14) te rawn che ṭha deuh lo phei se an dinhmun a chhe hlein a rinawm - over riatah run 67 an siam a, wicket nga an hloh.
New Zealand bat hun a thleng a, eng ruai an ang bik lo. Run siam hnem ber Colin de Grandhomme chuan a tawp thleng damin run 17 a tlin hram a, over riatah run 61 siama wicket ruk hlohin a tlawm zawkah an ṭang ta a ni.
Indian bowler ten Kiwis an hmachhawn hi an thiam thil show nan an hmang a, Jasprit Bumrah chuan over hnih a vawmah run kua lek pein wicket hnih a la a, Hardik Pandya chuan over khat a vawmah run 11 pe mah se player pahnih an run out a, bowler chet ṭhat India hian an chakpui.
India hian November 11 aṭangin Sri Lanka nen test series an khel leh ang.