Indian Super League A hun a thleng hnai ta

India ram football inrelbawlna fuh tawk loh avangin India-in league pahnih a nei a, I League leh Indian Super League a ni. Tun hma zawnga player-ten ISL leh I League an khelh kawp ang khan tun season-ah erawh khelh kawp theih a ni tawh dawn lo.

ISL lamin sum an ngah zawk a, a theh lar lamah pawh I League-in an umpha lo tih hai rual a ni lo. ISL khelh hun tur a chiang tawh a, fixtures nen lam a awm tawh - November 17-ah khelh ṭan a ni dawn. Chuhtirualin I League khelh hun tur erawh tun thlengin thu chiang a la awm thei lo a, ISL boruakin Indian football a tuam mek.

Mizo telna

Indian Super League-ah Indian player 156 an inlan dawn a, heng zinga player 16 hi Mizoram player an ni. Guwahati-a innghat NorthEast United-in Mizoram player pahnih an kawl a, tawnhriat nei ngah Lalrindika Ralte leh Robert Lalthlamuana te an ni. I League aṭanga ISL lama insawn thlang ta zawk Bengaluru FC-in Mizo pathum an kawl dawn a, midfielder Malsawmzuala, Lalthuammawia Ralte leh Zohmingliana Ralte te an ni. Bangalore club hian Daniel Lalhlimpuia kawl bawk mah se Serchhip tlangval hi AFC Cup atana an chelh a ni a, reserve player a ni - ISL squad-a awmsa zingah inhliam an awm a nih chuan squad-ah dah chhoh a ni ang.

Chennaiyin FC-in season hmasaa an kawl sa Jeje Lalpekhlua leh Jerry Lalrinzuala-te chu draft-ah pawh chhuahtir loin an chelh bet a, Delhi Dynamos-in Lallianzuala Chhangte leh Lalhmangaihsanga Ralte te an kawl thung. Pune City-ah Lalchhuanmawia Fanai leh Isaac Vanmalsawma an awm a, Kerala Blasters-in season hmasaa I League champion Lalruatthara leh Lalṭhakima an kawl. Mumbai City-ah Mizo pakhat Lalchhawnkima a awm a, ISL club thar Jamshedpur FC chuan rawlthar ṭhangduang pahnih Jerry Mawihmingthanga leh Sairuatkima an kawl. ISL club zingah Atletico de Kolkata leh FC Goa chu Mizoram player kawl lo awmchhun an ni.

Hlawkna

India ramah football tihlar tumin nasa taka hmalak a ni a, khawvel huap pawha player hriat hlawh Alessandro Del Piero, David Trezeguet, Robert Pires, Roberto Carlos leh Diego Forlan te meuh pawh sum tam tak sengin chah luh an lo ni tawh - heng player rual te hian inkhel entu an hip tih hai rual a ni lo a, Indian player-te khawvel huap pawha star ni phak kianga khelh hi an hlawkpui em em bawk.

Chennaiyin FC-a Manchester City midfielder hlui Elano nena kheldun ṭhin Jeje Lalpekhlua chuan, "Training session pangngai a zawh hnuah pawh mahniin a hranin ka practice leh ṭhin a, hemi kawngah hian Elano hian min pui nasa a, hma ka sawn pui takzet a ni," tiin Vanglaini a lo hrilh tawh a, Mizo player tam tak hian Jeje-a sawi ang sawi tur hi an nei ṭeuh ang.

Player langsar

Season dang angin kuminah marquee player neih ngei ngei a ngai tawh lo a, season dang angin khawvel huapa hriat hlawh player sawi tur an tam lo. Chutihrualin player an chhia tihna a ni lo a, ram pawn player pariat nei thei ISL club ten kum upa tawh lam, hming langsar ringawt thlang lovin an vanglai hmang mek player an lalut nual a, inelna sang sawt tura beisei a ni.

Player langsar zingah ATK tan Tottenham Hotspur striker hlui Robbie Keane a khel dawn a, Kerala Blasters-in Manchester United player hlui pahnih Dimitar Berbatov leh Wes Brown an lalut bawk - Keane leh Berbatov hi an kum tam tawh mah se Premier League club sawmna hnara ISL lam rawn pan an ni a, Indian football-a langsar turin an la thiam tawk ang tih a chiang.

Coach langsar

Indian Super League-in season dang ang bawkin coach langsar an kawl leh nual tawh a, ATK enkawl tur Teddy Sheringham hi tu nge a nih football ngainatu inti zingah inhrilh nawn a ngai lo. Manchester United-a Sir Alex Ferguson hlawhtlinna kawnga thawhhlawk tak, a assistant rinawm leh Fulham boss hlui ni bawk Rene Meulensteen chuan Kerala Blasters a enkawl ang.

Jamshedpur boss tur Steve Coppell hi season hmasaa Kerala Blasters lo enkawl tawhtu kha a ni a, Manchester City leh Crystal Palace meuh lo enkawl tawh a nih avangin a chanchin sawi nawn a ngai lo. Miguel Angel Portugal hi Real Madrid technical director meuh ni thei a ni a, Delhi Dynamos-ah a tawnhriat ngah hman ṭangkai a tum ang. John Gregory-a'n kum 2015 hnua a vawi khat nan coaching hna a thawk leh dawn a, Aston Villa boss hlui hian Chennaiyin a kaihruai dawn.