Ram tana khel thei lo Azarenka

Victoria Azarenka chuan an ram Belarus leh United States ten Fed Cup final an khelh huna a inlan ve thei lo tur chu hrehawm a tih thu a sawi chhuak.

Kum 28 mi Azarenka hian fa a neih hnuah a duh angin tennis a khel mumal thei tawh lo, inkhel turin inpeih tawh mah se US Open-ah pawh a fapa enkawl a ngaih avangin a inlan thei lo tawhbawk a ni.

Grand Slam vawi hnih champion tawh Azarenka chuan, "Belarus tana khel thei lo nih chu thil hrehawm leh lungchhiat thlak tak a ni. Ka thinlung chu kan ram tana feh chhuak team zingah a tel ve reng a, chhungkaw dinhmunin a zir miau loh chuan tih ngaihna a awm lo a ni," tiin ani lo chu a fapa enkawl tur dang a neih rih loh thu a sawi.

Belarus hian a vawi khat nan ram leh ram hmeichhe tennis team hmanga inelna final hi an khel dawn a, Azarenka a awm tak lohah chuan world number 78 Aryna Sabalenka chu an ram innghahna tur a ni ang - Sabalenka hi kum 19 mi chauh a la ni.

Hmeichhe player nei ṭha ram US hian fa neih vang bawkin Serena Williams leh a unau Venus Williams an chhawr dawn bik lo a, US Open champion Sloane Stephens, Coco Vandeweghe, Shelby Rogers leh Alison Riske te an inlan thung ang.