Stamford Bridge-ah Arsenal an lut dawn
Premier League hmahruaitu Arsenal chuan Pathianni zan dar 5:30-ah Chelsea hmachhawn turin Stamford Bridge an tlawh dawn. Mikel Arteta naute hi chetsual zeuh chuan hmahruaina hloh thei an ni a, inkhel a hmuhnawm khawp ang.
Blues hian Gunners captain hlui Pierre-Emerick Aubameyang an nei, Gabonese striker hian a club hlui hmachhawn tura a inpeih thu a sawi zauh - Barcelona tana a khelh lai khan Arteta a ngaihsan loh thu a lo sawi tawh bawk; ani hi boruak tisangtu a ni thei dawn.
Auba awmna
Arsenal khan captain a nihna an hlihsak a, chumi duhtawk loin Emirates Stadium aṭangin an nawr chhuak lui a ni ber. Auba-a'n amah hnawltu Arteta chu player lian leh langsar enkawl thiam lo tiin a lo sawi tawh a, hei hi tun hnaiah an tharthawh leh nasa.
Arteta chuan, "Arsenal hmachhawn turin Aubameyang a inpeih tih kan hria, hei chu player-in a tih tur pangngai a ni, midang pawhin an sawi ve tur tho a ni," tiin a sawi a, a striker hlui chu theihna nei sang a nih avangin ven a ngaih thu a sawi bawk.
Spanish manager chuan sawi zawmin, "Chelsea team dan kan tum dawn a ni a, mimal thil a ni dawn lo. Stamford Bridge-a hnehna chang tur chuan a khel ṭha zawk nih ngei ngei a ngai," tiin a naute chu theihtawp chhuah turin a fuih.
Potter-a enkawl
Graham Potter an neih hnuah Chelsea hian zawimuangin hma an sawn, an hmasawnna langsar tak pakhat chu tlarhnung a phui ta deuh hi a ni. Mahse, English manager hi a club hlui Brighton laka mualpho hlim a ni.
Reece James leh Ben Chilwell te hliam vangin an chhawr thei dawn lo. Potter hian a team rem dan kalhmang a la thluak kual deuh reng a, a bik takin wingback a hmang kual nasa. Raheem Sterling leh Christian Pulisic te pawh tawlh hnung thut thei an ni ang.
Hliam vanga khel thei lo nei nual mah se Chelsea squad hi a chhah ṭha tawk a, buaina tham a tling lo ang. Potter-a'n a enkawl an nih tawh avangin an game kalphung a danglam tawh a, hmahruaitu Arsenal tan fimkhur a ngai dawn.
Arsenal boruak
Emile Smith Rowe bak hliam langsar an nei hran lo, mahse Ningani zana Zurich an hneh ṭumin defender Takehiro Tomiyasu chu hliam vanga lakchhuah a ngai. Japanese defender hian Chelsea a hmachhawn theih a rinawm loh.
Arteta-a'n Tomiyasu a chhawr thei lo a nih pawhin Kieran Tierney a la awm. Tierney hi player ṭha pangngai tak a ni, mahse, Tomiyasu angin tharum a ngah tawk lo - Chelsea lamin hei hi an hmuh hmaih lo ang, an nawr natna lai tur a nih pawh a rinawm.
Gabriel Jesus-a'n tun hnaiah goal khung a harsat. Mahse, Brazilian striker hi team tan a ṭangkai ṭhin. Arteta-a'n, "Goal khung lo mah se assist vawi thum vel zel a neih chuan a pawina a awm lo," a ti, ani hi Blues tana hnawksak tur a ni ang.
A chung berah Arsenal
Arsenal chak nan Kieran Tierney-a goal ropui a tawk a, an mikhual Zurich chu 1-0 a hnehin Europa League group A-ah a chungnung ber an ni a, playoff khelh ngai loin last 16 an lut tlang nghal.
Emirates Stadium-ah Gunners hian duhthusama ṭhain an khel lo, mahse goal an khung bakah anmahni goal an venghim thei lo, an tum ram an thlen theih phah - anmahni hnaih bertu PSV Eindhoven aiin point hnihin an sang.
Arsenal manager Mikel Arteta chuan, "Hmabak pakhat chu kan thawk zo. Ka ngaihdan chuan kan khelh ṭhat ber ni a ni lem lo, mahse hnehna kan chang. Tuna hnehna kan chang thei hi a pawimawh hle, a hlutna chu February thlaah kan hre zual ang.
"Playoff kan pumpelh chauh a ni lo, chak loh lai chuan hnehna chan hian kan in huhona boruak pawh a ṭha zawk zel," a ti, tun season kal laiah Emirates Stadium bika an match khelh hoah hnehna an la chang vek a ni.