Gerard Pique - tawpna hun chu a thleng ta!
Ningani zan khan football fan-ten thin ṭhawng dawt thu pakhat an hria a, chu chu Gerard Pique-a'n inkhelh a chawlhsan thu a ni - Barcelona legend hian season kal laiin inkhelh a chawlhsan tur thu a puang a, football khawvel titi a tling nghal.
Kum 35 mi defender chuan, "Barca hnuah club dang tan ka khel dawn lo tiin ka sawi fo ṭhin a, chutiang chiah chuan ka ti dawn a ni," a ti a, Catalan club ni lo club dang tan khelh a tum tawh lo.
Barcelona hian zanin dar 1:30-ah Almeria an mikhual dawn a, Pique-a match hnuhnung ber a ni dawn tihna a ni. Barca hian league match 12 khelh tawhah point 31 neiin, hmahruaitu Real Madrid chu point khat chauhin an phak lo mek - Champions League group stage aṭangin an tla zui.
Hmangaih hmasa
Spain tan vawi 102 inlana goal nga khungtu Pique hi Barcelona a piang a ni a, Barca academy-ah 1997-2004 a inzir hnuin, kum 2004-ah Manchester United a zawm a, inelna hrang hrangah match hnih khelhsak hmanin, goal hnih a khung a, Old Trafford-a a awm lai hian Real Zaragoza-ah season khat loan-in a khel.
May 2008 khan a club hmangaih Barcelona-ah a kir a, a hawikir leh tawh lo - Catalan club tan match 615 zet khelin, goal 53 a khungsak a, assist vawi 15 a nei. La Liga (8), Copa del Rey (7), Supercopa de Espana (6), Champions League (3), UEFA Super Cup (3) leh FIFA Club World Cup (3) ah te a champion pui bawk a, a nep lo hle.
Spain tan pawh Pique hian hmun pawimawh chang chungin, 2012 European Championship leh 2010 World Cup-ah te champion nomawi a chawi a, lungawi tak chungin football khawvel chu a mangṭha ta.
Mangṭha Barca
Pique-a'n season laklawh laiin inkhelh a chawlhsan thu a puang a, August 2018-a international football lo mangṭha tawhtu thutlukna siam hi mak ti an tam mai thei - mahse, Barca tana hmun pawimawh a chan tawh loh dan ngaihtuah chuan a mak hran lo.
Spanish defender hian tun season inelna hrang hrangah Catalan club tan match kua chiah a la khel a, heng zinga match liah chiah hian bul a ṭan - goal khung leh assist a nei lo a, yellow card vawi hnih a hmu thung!
A vanglaia eng team tan pawha bul ṭan phak tur Pique-a'n a hun tawp a hnai tawh tih a hai lo a, club-in sum avanga harsatna lian tak a tawh lai pawha ihe loa a hlawh tihniamtu defender hian chawlh a puang ta - FIFA FIFPro World11-a vawi li lang thei defender chu kan thlah dawn ta.
Video-a Pique-a thusawi
Culers (Barca ṭantute sawina), Gerard ka ni e.
Tun hnaiah ka chanchin sawi tam tak a awm tih ka hria a, vawiin thleng hian engmah sawi ka nei ve lo thung. Mahse, tunah chuan ka chungchang thu sawia ka ṭawng ve a ngai tain ka hria. Nangmahni ang thoin Barca fan ka ni a, football ngainatu Barca chhungkuaa piang ka ni a, naupangtê ka nih aṭanga ka duh ber chu football player nih, ni loin, Barca player nih a ni.
Kha naupang, duhthusam ve fo ṭhin kha tunlai chu ka ngaihtuah chhuak fo mai - kha naupang Gerard kha, Barca first team tan a la khel ang a, nomawi chawi theih zawng zawng a chawi ang. European champion leh world champion a la ni ang a, khawvela player ṭha ber ber kiangah khelin, captain armband hial a hreng ang a, damchhung atan ṭhian duhawm tak tak a chhar bawk ang, tiin a mang ramte chu a la thlen dik vek tur thu hrilh ta ila, engtin tak ngai ang maw?
Barca ka zawm aṭangin kum 25 zet chu a lo liam ta. Ka kal zet a, ka lo kir leh a nih kha. Football hian ka mamawh zawng zawng min pe a, Barca ṭantute u, nangni hian engkim min pe a ni. Mahse, tunah zawng, kha naupang duhthusam zawng zawngte kha a thlen tak vek avangin, ka zinkawng chu tihtawp mai ka tum tih ka sawi duh a ni.
Barca hnuah club dang tan ka khel dawn lo tiin ka sawi fo ṭhin a, chutiang chiah chuan ka ti dawn a ni. Inrinni zan kan inkhel tur hi Camp Nou-a ka match hnuhnung ber a ni dawn a, fan rinawm tak ka ni zui ang. He team hi ka thlawp reng dawn a, ka chhungten an tih ang tho khan Barca ka hmangaihna chu ka fate pawh ka hlan chhawng ve dawn a ni.
Min hriat kha - engtikah emaw chuan ka lo kir leh ang a, Camp Nou-ah ka hmu ang che.
Barca dam reng rawh se.