Team ṭha si, talbuai si pahnih - Liverpool vs Spurs

Pathianni zan dar 10:00 a lo thleng ang a, football ngaina intite chuan TV an en ṭhup dawn - Tottenham Hotspur-in league match khel turin Liverpool an mikhual dawn tlat a, khaw dang hawisan phal a ni lo.

Table aṭanga teh chuan team pahnih inhmachhawn tur hi en châkawm a ni lo. Mahse, club pahnih player neih dan te, coach pahnih huhang ngah dan te, fans boruakte thlir tel vek chuan hmaih phal chi a ni lo thung.

Liverpool-in point 10 ngawtin Spurs phak rih lo mah se Reds hi Manchester City hnehtu an nih miau avangin dah hniam theih an ni lo a, tun hnai an result thlir phei chuan team pahnihah han in uankhum thei viau an awm lo.

Champions League-a Son Heung-min inhliamin tlarhmaa Tottenham buaina a belhchhah a, Napoli laka hnehna chang hlim Liverpool-in chak beiseina nen London khawpui an pan ang.

Buaina ral lian
Spurs-in league match 10 khelh hnua Premier League bul an ṭan ṭhat ber season an hmang a, mahse, nuam ti taka he chanchin an sawi hnu lawkah hian league match hnih a zawnin an tlawm a, Manchester United (2-0) leh Newcastle United (2-1) an ngam lo.

Hei chauh a ni lo - awlsam taka Champions League last 16 lut thei tur khan Sporting Lisbon lakah point thum an mamawh laiin, point khat an hlawh chhuak hram a, Jurgen Klopp-a'n CL match hnuhnung berah ngaih ṭha taka player a siksawi lai khan Conte chuan hah thi kula beiin, Marseille chu 2-1 in an hneh hram.

Champions League match kar lakah Bournemouth chu 3-2 in an hneh hram a, Rodrigo Bentancur-a'n hun pek belhah chakna goal a khung - he team hi an buai tih phat rual a ni lo a, a nem nghettu chu Conte-a'n pawisa a mamawh belh thu a sawi kha a ni.

Spurs-in an hliam tuam dam tuma, damdawi an indap chawp mek laiin, Liverpool-in an hliam tipunlun zual turin theihtawp an chhuah dawn a, mahse, Klopp-a team te hi hliam damkawr ve tho an ni, tih theihnghilh lo la!

A belhchhahtu
Conte-a'n hliam vangin tlarhmaah Dejan Kulusevski leh Richarlison a la chhawr thei lo a, hei hi duhtawk lo ni awm takin Marseille lakah Son Heung-Min a inhliam zui - Italian coach-in tlarhmaah duhthlan tur a nei chaurau ta hle.

Chelsea boss hlui Conte hian 3-4-3 a hmang nasa a, a nih loh chuan 3-5-2 a hmang ṭhin. Kum 53 mi coach hian tlarhmaa player a neih dan en chuan, 3-5-2 a rawn hmang maiin a rinawm a, goal nawr tura wing back chunga rinna nghat chungin, tlarhmaah Lucas Moura chuan Harry Kane a kawp thei ang.

Mual ding lam sir aṭanga goal nawr nuam ti tak Lucas hi Kane nen inkawptir 'chhin' chi a ni ang em, tih chu zawhna awm thei tak a ni - an tum tur hi Liverpool an ni tlat! Mahse, Conte hian 3-4-3 a hmang lui dawn a nih chuan Kane thlawp turin Lucas bakah wing back anga a chhawr ṭhin Ivan Perisic a pawh hma a ṭulin a rinawm.

Spurs hian Bryan Gil an nei bawk tih hriat a ṭha a, Reds laka rin ngam erawh a harsa. A tawi zawnga sawi chuan, Conte-a'n eng formation pawh hmang se, tlarhma phuahchawp a ngai dawn tihna a ni a, Champions League-a Victor Osimhen leh Khvicha Kvaratskhelia te paltlang theih loh Liverpool tlarhnung paltlang a huphurhawm mai thei.

Hei le Liverpool
Liverpool tlarhnung hi sawi ṭhat viau dawnin, Nottingham Forest leh Leeds United laka goal an ven theih loh avanga tlawm kha an ni a, Kane-a te ang 'class' tan harsa tur awmin a lang lo.

Chutihrual chuan Liverpool fan-te ngaih tiṭha turin hliam vanga a chawlh reng hnuah Ibrahima Konate a lo kir leh tawh a, kum 23 mi defender awm hnuah Virgil van Dijk a khel ṭha sawt - a awih lo tan Napoli an hnehna inkhel kha en theih a ni.

Mahse, Liverpool hi insiamṭha ta anga sawi hluai erawh a rem lo - he team hi Manchester City hneh a, Forest ngam lotu, match khata goal kua an khung hnu lawka chak tura injury time mamawh team kha an ni a, tun season zet chu an kaltluang lo hle.

Chutihrual chuan Spurs hian tun season-a Big Six an hmachhawn tawhah chak an la nei miah lo a, Chelsea (2-2) an inhnehtawkpui hnuah Arsenal (3-1) leh United (2-0) an ngam lo a, Liverpool-in beiseina an nei ang.

An insiam ṭha?
Liverpool-in hliam vangin Diogo Jota leh Luis Diaz an chhawr thei lo mek a, player pahnih theihna enin channa a ni. Mahse, Reds tan Mohamed Salah-a'n ngai a awh chho ṭan a, kum 30 mi forward hian match hnih a zawnin goal a khung tawh.

Salah hian Champions League-a an match hnuhnung pangaah phei chuan goal a khung vek a, tun season-a a form loh thu an tlangaupui forward hian inelna hrang hranga match 19-ah goal 12 a khung leh der tawh a, assist vawi nga a nei.

Darwin Nunez a tlangnel chho ṭan a, Napoli laka goal khungtu pawh hian match 15-ah goal sarih a khung der tawh a, Roberto Firmino hian match 18-ah goal riat khungin assist vawi li a nei tawh bawk.

Mahse, Klopp chuan, "Kum 55 ka ni tawh a, zun chhuak vangin zanah ka harh fo ṭhin. Tun hnaia min tiharhtu erawh Leeds United laka kan goal chhuah dan kha a ni," a ti - Pathianni zanah tlarhnung tan chetsual a thiang lo a, vawi khat chetsuala hrem theitu Kane a awm tih hriat a ṭha.