Police tan Sawmfela bawk

Honda MPL9-ah Mizoram Police leh Chhinga Veng te 1-1 in an inhnehtawk. Nimin Lammual inkhelah Chhingcows-in Valallawmtluanga hmangin an khung hmasa a, Police-in Malsawmfela hmangin siphurh an sut.

Inkhelh ṭan hun hi dar 11:30 a nih avangin inkhel a nung tawk lo a, team pahnih goal bawh a na tawk lo. Chhinga Veng an vannei a, Police defender Lalhmunmawia'n a kut a tauh per zarah penalty an hmu a, minute 29-naah Lawmtluanga'n goal-ah a chantir.

Police pawhin Sawmfela hmangin goal khungna remchang an nei a, Chhingcows keeper RS Lallawmzuala'n ṭha takin a dang. Second half-ah erawh Police an vannei a, Chhingcows defender Rorelliana leh keeper Lawma te an insut buai avanga ball per chu Sawmfela'n minute 53-naah a khung.

Sawmfela hian MPL9-ah goal nga a khung tawh a, goal khung tam ber a nih piah lamah a pawimawh ṭhin hle. Amaherawhchu nimin inkhelah Sawmfela leh Police-in goal an khung belh theih loh avangin point khatah an lungawi a ṭul a, semifinal kawng a awlsam dawn lo.