Europa League Playoff khel tur Manchester United

Manchester United tan hnehna chan ringawt a tawk lo a, group hmahruaitu ni tur chuan goal hnih tala chak a ngai. Erik ten Hag-a nauten Real Sociedad 1-0 in hneh mah se an mamawh zat goal an khung lo, pahnihna ni chungin knockout stage an lut.

Nakkum February thlaah playoff hi khelh a ni dawn. Manchester United leh group danga pahnihna te bakah Barcelona, Juventus, Ajax, Shakhtar Donetsk, Bayer Leverkusen, Sporting Lisbon, Red Bull Salzburg leh Sevilla ten last 16 luh an inchuh ang.

Goal khat
Ningani zan inkhelah rawlthar Alejandro Garnacho chuan goal awmchhun a khung. Garnacho hian Cristiano Ronaldo-a ball siamsak chu box chhunga tlan luhpuiin chiang zetin a khung a, a club tana inkhel bul a ṭan vawi hnihnaah goal pawimawh a khung.

Kum 18 mi Garnacho hian a mi ngaishan tak Ronaldo-a tih danin a goal khung a lawm. Portuguese forward Ronaldo-a'n an dinhmun sawhngheh zual theihna remchang a nei a, mahse goal chhungah a pet lo.

West Ham laka Man United chhanhimtu David de Gea pawhin hna hautak chu a nei ve tho. Spain tana an koh loh keeper hian Andoni Gorosabel leh Pablo Marin te khung tur chu ṭha zetin a dansak a, ram tana koh a nih loh hnu match pahnihah a khel ṭha hle.

Hmabak playoff
Man United hian group match hmasa berah Real Sociedad hi an ngam lo, a hnu lamah erawh an chak vek - Spanish club nen hian point 15 ve ve an hmu a, point hmuh zat inangah goal difference en niin, English club hi goal khatin an hniam zawk.

Ningani zan khan Ten Hag-a naute hian goal khat khung belh ni se, an elpui lamin goal an chhuah tam phah dawn bawk tihna a ni. Last 16-ah Sociedad an lut a, pahnihna Man United hian Champions League aṭanga tlate nen round of 32 an khel dawn.

Playoff-a inhmachhawn tur hi tihchian a la ni lo, tuna a lan dan chuan Man United hmachhawn theih zingah Barcelona leh Juventus te an awm tihna a ni. Ronaldo-a'n a club hlui a hmachawn thei dawn tihna a ni a, match hautak pahnih an neih belh dawn tihna a ni bawk.

Inkhel dang
Group F-ah Feyenoord, FC Midtjylland, Lazio leh SK Sturm Graz te an awm a, an pali hian match ruk an khelh hnuah point riat vek an hmu! Goal difference nei ṭha Feyenoord leh Midtjylland te an tlang.

Chak mamawh Lazio chuan Feyenoord 1-0 in an ngam lo. Italian club enkawltu Maurizio Sarri chuan, "Goal khat chauh kan chhuah kha kan vannei, goal khung theihna remchang kan pe hnem lutuk kha a pawi," a ti a, kartawpa Serie A khel turin insiamṭhat nghal a ngai tih a sawi bawk.

Jose Mourinho enkawl AS Roma pawhin Ludogorets 3-1 in an hneh, Italian club tan Lorenzo Pellegrini-a'n penalty aṭangin goal hnih a khung a, hun tawp dawnah Nicolo Zanilo chuan chak a nemnghet bawk.

Real Sociedad 0 - 1 Manchester United
Sheriff 1 - 0 Omonia Nicosia
Midtjylland 2 - 0 Sturm Graz
Feyenoord 1 - 0 Lazio
Olympiakos 0 - 2 Nantes
Qarabag 1 - 1 Freiburg
Trabzonspor 1 - 0 Ferencvaros
AS Monaco 4 - 1 Red Star Belgrade
Arsenal 1 - 0 Zurich
Bodo/Glimt 1 - 2 PSV
Dinamo Kiev 0 - 2 Fenerbahce
Rennes 1 - 1 AEK Larnaca
Real Betis 3 - 0 HJK
AS Roma 3 - 1 Ludogorets
Union Saint-Gilloise 0 - 1 Union Berlin
Sporting Braga 2 - 1 Malmo