Werner-a'n World Cup a khel dawn lo

Germany forward Timo Werner chuan a kerek hliam vangin World Cup a khel thei dawn lo a, kum thar hma chu German striker hi a hmel kan hmu tawh dawn rih lo.

Kum 26 mi striker hi Champions League last 16 lut tura RB Leipzig-in 4-0 a Shakhtar Donetsk an hneh ṭum, Nilaini zan khan a inlan a, minute 19-naah hliam vangin lakchhuah a ni.

RB Leipzig chuan, "A hliam endik a nih hnuah a kerek vei lamah hliam na tak a nei tih hmuh a ni a, kum 2022 chhung chu a inlan tawh lo ang. A hliam enkawl dan tura thutlukna chu siam thuai a ni ang," tiin thuchhuah an siam.

Germany coach Hansi Flick chuan, "Chanchin hriat nuam lo tak a ni a, Timo hian World Cup khelh a chakzia ka hriat avangin pawi ka tihpui hle a ni," a ti.

Chelsea-a beisei phak lo Werner hian Germany a kir hnuah ngai a awh chho a, Leipzig tan match 16 a khelhah goal kua a khung leh der tawh.

Werder Bremen striker Niclas Fullkrug chungah Germany tan rinna nghah a ṭul dawn niin a lang a, ram tana la inlan ngai lo striker hian tun season-ah league match 12 aṭangin goal kua a khung tawh.

Germany tan match 55-a goal 24 khungtu Werner chuan, "Pawm thiam a harsa takzet. Kar engemaw zah ka chawlh dawn avangin World Cup ka khel thei dawn lo a, RB Leipzig leh Germany te mahni in lum aṭanga ka lo thlawp mai a ṭul dawn a ni. Min ngaihventu zawng zawng chungah lawmthu ka sawi e," a ti.

Die Mannschaft (Germany sawina) hian November 23, zan dar 6:30-ah Japan hmachhawnin, World Cup zinkawng an ṭan dawn a, group E-ah hian Blue Samurai bakah Spain leh Costa Rica te nen inelna an hmachhawn ang.