Goa-in nuamsain hnehna an chang

Jamshedpur FC-in inrintawkna an neih vanglai takin FC Goa an lenchilh a, mahse, Ningani zana Indian Super League inkhelah mualneitu Goan club hian 3-0 in hnehna an lo chang.

FC Goa hian goal khung turin an nghak rei lo - minute hnihna lekah Athletic Bilbao academy chhuak Iker Guarrotxena chuan goal hmahruai a khung a, Morocco international Noah Sadaoui leh Indian midfielder Brison Fernandes ten an belhchhah leh bawk.

Kum 21 mi Brison tan ISL-a a goal hmasa ber a ni a, goal a khung hian hun pek belh a nih tawh avangin FC Goa hi an chak dawn tih a chiang tawh.

Goan club tan Aizawl FC academy chhuak Ayush Chhetri chuan bul ṭanin, minute 90 a khel tluan a, tun season-a match li an khelh tawhah a la inlan vek - ISL-a a season hmasa berah a tlangnel nghal hle.

Jamshedpur tan Ricky Lallawmawma leh Laldinliana Renthlei te chuan ṭum dang ang thoin bul an ṭan a, an khel tluan bawk. Bench aṭangin Laldinpuia Pachuau a lut thung a, mahse, Jamshedpur-in ISL match 100 an khelh tlin zanah an team an chakpui zo lo.

Season hmasa lawka league winner shield dawng thei Jamshedpur hian insiamṭhat an mamawh - league match li an khelh tawhah vawi khat chiah an la chak a, an khelh leh tur hmasa berah team ṭha Hyderabad FC an tum dawn bawk si avangin Watford boss hlui Aidy Boothroyd tan ngaihtuahna sen ṭhat a ṭul.

FC Goa erawh East Bengal (2-1) leh Chennaiyin (2-0) an hneh hnuah Hyderabad (1-0) lakah tlawm mah se Jamshedpur lakah an insiamṭha lehnghal a, tun season ISL-a team tum châkawm lo pawl an ni zel ang.

Nizan East Bengal leh Chennaiyin inkhel result kan hre hman lo a, zanin dar 5:30-ah Hyderabad chuan Mizo pariat awmna Odisha FC an mikhual ang a, zanin dar 7:30-ah match li khelh tawha chak la nei lo, Mizo pali awmna NorthEast United leh K. Lalṭhathanga (Puitea) khelhna Kerala Blasters an intawng ang.

Season hmasaa ISL final kheltu Blasters hian match hmasa bera East Bengal (3-1) an hneh hnuah chak an nei leh tawh lo a, match thum chu a zawnin ATK Mohun Bagan (5-2), Odisha FC (2-1) leh Mumbai City (2-0) an ngam lo tawh - zaninah insiamrem an tum dawn.

Pathianni zan dar 7:30-ah inkhel pakhat a awm dawn a, Lallianzuala Chhangte leh Lalengmawia Ralte (Apuia) awmna Mumbai City chuan Lalrinliana Hnamte khelhna Mohun Bagan an mikhual ang.