Chawnpuiin Aizawl FC an chelh

Honda MPL9-ah semifinal inchuh boruak a sang zel. Nimin khan Chawnpui FC-in Aizawl FC an chelh a, 1-1 in an inhnehtawk. Lalsangzuala Hmar hoten point khat hlu tak an hlawh chhuak.

Lammualah football hmuhnawm chhawpchhuah a ni a, ball pet thiam player hmuh a ni. First half-ah goal a luh loh hnuin minute 62-naah Aizawl FC midfielder Lalchhanhima Sailo-in freekick aṭangin goal kilah tak a pet lut.

Indian Arrows captain hlui Chhantea ball pet thiamzia hmuh a ni a, Aizawl FC chak nan erawh a tawk lo. Chawnpui forward MC Malsawmzuala'n freekick aṭang thoin mawi zetin minute 73-naah a khung. Siaha tlangval hian MPL9-ah goal nga a khung ta.

Aizawl FC-in hun tawp hma hretin Chawnpui player handball vangin penalty an beisei a, pek an ni lo. Chutihrualin team pahnih an khel ṭha a, point hmuh an phu ve veah a ngaih theih.

I League club-in point 23 an hmu a, semifinal an lut mai dawn. Chawnpui pawhin point 15 an hmu a, Chhinga Veng leh Venghnuai nen an point hmuh zat inangin semifinal an beisei ve zel.