T20 World cup semifinal intum tur a hriat ta ; New Zealand Vs Pakistan; India Vs England

T20 Cricket World Cup-ah India-in group match hnuhnung ber khelh hmain semifinal an lut a, final lut turin England an hmachhawn dawn. Netherlands-in thilmak thlentirin South Africa an hneh a, Pakistan-in semifinal an luh phah. Shaheens hian semifinal-ah New Zealand an hmachhawn dawn a, final-ah cricket khawvel hmuh châk India leh Pakistan te inhmachhawn thei dinhmunah an ding.

Thilmak chu
Adelaide Oval-ah chak mamawh South Africa-in Netherlands an hmachhawn a, ṭhum vawrah vanneiin vawm hmasak an thlang. Proteas hi chak ngei tura ngaih ni mah se Netherlands top order Stephan Myburgh (37), Max O'Dowd (29), Tom Cooper (35) leh Collin Ackermann (41*) ten run an siam ṭha a, 158/4 runs siamin chakpui theih target an siam.

South Africa tan hlauhthawnna tur awmin a lang lo a, mahse Proteas batter zingah che ṭha fal an awm lo. Run siam tam ber Rilee Roussouw pawhin 25 runs chauh a siam a, over 20-ah 145/8 chauh an siam avangin 13 runs-in an chak lo. Netherlands-in semifinal luh phah lo mah se Proteas an hneh avangin qualifier khelh ngai loin 2024 T20 World Cup khel turin an tling nghal.

Pakistan an lawm
South Africa an chak loh hian India-in semifinal an lut chiang a, Bangladesh leh Pakistan-in semifinal beiseina an neih phah bawk. Adelaide Oval-ah Tigers opener Najmul Hossain Shanto-a'n 54 runs siam mah se over 20-ah 127/8 chauh an siam.

Pakistan-in hun ṭha an bawhpelh lo a, captain Babar Azam pawhin 25 runs thawhin Mohammad Rizwan (32), Mohammad Haris (31) leh Shan Masood (24*) te an che ṭha bawk a, ball 11 dah bangin 128/5 runs an siam. Shaheens hi wicket ngain an chak.

SKY a turu
India-in group match hnuhnung ber an khelh avangin semifinal-a an khingpui tur duh an thlang thei a, infiammi rilru dik tak puin Zimbabwe an sawp a, England nen final khel tur an zawng ang.

Melbourne Cricket Ground-ah India tana chanchin lawmawm chu opener KL Rahul a che ṭha chhunzawm a, 51 runs a siam. Batter zinga che ṭha ber erawh Suryakumar Yadav a ni a, kum 32 mi hian ball 25 lekah 61 runs siamin India-in 186/5 runs an siam.

SKY hian kuminah T20 bikah innings 28 aṭangin 1020 a siam a, kum khat chhunga 1000 runs chuang siam thei pahnihna a ni. Pakistan wicketkeeper Mohammad Rizwan chuan kum 2021 khan innings 26 aṭangin 1326 runs a siam tawh bawk.

Zimbabwe bat hun a thleng a, India-in target an chhawpsak a san bakah Men in Blue bowler-te an ṭhat avangin 115 runs chauh an siam. Rohit Sharma hote 71runs-in an chak.