Vawiin chhun leh zanah Mizoram Premier League

Honda MPL9 chu vawiin hian RG Sadium, Mualpuiah khelh a ni dawn a, round 10 match li khelh zawh a nih dawn avangin a nghawng a lian dawn hle. Chawhma dar 11:00-ah match hmasa ber khelh a ni ang a, match tawp ber hi zan dar 7:30-ah khelh a ni dawn - match zawng zawng hi a pawimawh vek.

MPL club pariatte hi chi hnihah a thliar theih. Chi khatnaah champion lai leh hmahruaitu Aizawl FC bakah Mizoram Police, Chhinga Veng FC, FC Venghnuai leh Chawnpui FC te an awm. Heng club pangate hi semifinal khelh inchuh tur an ni. Chi dang leh chu MPL-a inhamtan tum club-te an ni a, chumi huangah chuan Electric Veng FC, Chanmari FC leh FC Bethlehem te an awm.

Chanmari Vs Venghnuai
Chawhma dar 11:00 inkhel tur hi a pawimawh a, khua a ṭhat a rinawm avangin inkhel erawh a ṭang at thei lo ang. Chutihrualin point thum pawimawhna a ngai reng dawn a, Chanmari leh Venghnuai tan point thum hi a hlu takzet.

Chanmari FC-in coach atana K. Malsawmkima an hman hnuah chak ni hmel an la hmu lo a, match thum ngawt an chak loh zawn avangin relegate thei dinhmunah an ding hial. Venghnuai FC erawh season ṭantirhah chuan Chanmari aia dah hniam an ni a, tunah erawh coach Lalrindika Hmar hoin semifinal an thlir tawh thung.

Venghnuai hian match hnu-hnung berah table mawngphaha awm Bethlehem lakah goal an khung thei lo a, point khat chauh an hlawh chhuak. An goal khung khawl Lalrammuanpuia (Apuia) chu inhliam vangin an chhawr thei lo a, chutihrualin semifinal khelh an tum a nih chuan chhuanlam siam a thiang lo.

Chawnpui Vs Bethlehem
Tlai dar 1:30-a Chawnpui FC leh FC Bethlehem inkhel tur hi game danglam tak a ni dawn a, semifinal khelh tum Lalsangzuala Hmar hote hi an chak chiang tura ngaih ngawt theih a ni lo. A chhan chu coach Victor Lalbiakmawia hote hian Chawnpui hi I Day Football leh MPL-ah an hneh ve ve a, Bethlehemin vawiin hi point thum hmuh theihna turah an ngai ang.

Chawnpui hi match thum an chak zawn hnuah vawi hnih an inhnehtawk a, a eng zawnga thlir chuan match nga hneh loh an tawng tawh lo. Sanga hote hian match hnuhnung berah Aizawl FC lakah point khat hlu tak an hlawh chhuak a, semifinal khelh an tum avangin Bethlehem lakah point thum an hmuh loh chuan an lawm lo ang.

Aizawl FC Vs Police
Tlai dar 4:00-ah Aizawl FC leh Mizoram Police an inkhel dawn a, inkhel pali zinga en châkawm ber a ni. I League club hian point 23 an hmu tawh a, semifinal an lut chiangah a ngaih theih. Mahse AFC hian Police hi I Day Football final leh MPL9 match hmasa zawkah an hneh tawh lo a, a lungthu kim nana an hneh lo leh a nih chuan ser lian tak a awm dawn.

Aizawl FC hian chak ngei tumin an khel dawn a, Police lam tan draw a thiang bik lo. Lalbiaksanga Colney hote hian I League club aiin chak an mamawh zawk. I Day Football champion hi semifinal lut lo thei dinhmunah an ding a, Sikkim-ah invitation tournament khelh tur an neih bawk avangin squad kim laia point thum hlawhchhuah hi a pawimawh hle.

Chhinga Veng Vs Electric Veng
Khelmual remchan loh avangin MPL fixtures an thlak danglam nasa a, round 11 khelh zawh tawh niin vawiina an khelh tur hi round 10 a ni thung. MPL Board-in ṭhalai inkhawm zanah inelna buatsaih duh ngai lo mah se hun remchang a awm tak ngang loh avangin zaninah MPL a awm dawn a, Chhinga Veng leh Electric Veng te an inkhel ang.

Electric Veng hi coach Lalremtluanga hnuaiah an insiamṭha a, table mawngphah aṭangin paruknaah an invawrchho tawh. RT-a hoin EFC-in Chanmari 2-0 in an hneh thei a, Chhinga Veng lakah pawh point thum hmuh an inbeisei ang. Mahse, Chhingcows hi Electric Veng aia team ṭha zawk an ni a, semifinal khelh tum an ni. Chhinga Veng hian an ṭhenawm 'Electric Veng' hi an êng vanglai taka hmeh thim an duh ang.