City chhantu hliam damkawr Haaland
Hliam vanga match hnih a khelh loh hnua a lo kir lehna hmasa berah Erling Haaland chuan goal a khung lehnghal a, Fulham lakah Manchester City chu 2-1 in hnehna a chanpui.
Mahse, City hian hnehna chang turin vanneihna an mamawh a, Haaland-a goal khung hi hun pek belh minute nganaa a khung a ni a, penalty aṭanga lut a ni!
Etihad Stadium-a inkhelah City tan Julian Alvarez chuan goal hmahruai a khung a, mahse, a hnu lawkah City defender Joao Cancelo chu hnawhchhuah niin penalty a chawi bawk.
Fulham tan Andreas Pereira chuan penalty aṭangin si phurh hi a sut a, team pahnih an inhnehtawk mai dawna a lan hnuah City an vannei a, penalty hmangin an chak hram.
Boruak a 'hot'Fulham-in City an lenchilh hmaa an league match hnuhnung paliah tlawm an nei lo a, mahse, heti chung hian Etihad Stadium-a point hlawh chhuak tura beisei ngam erawh an ni lo - team pahnih an inthlau hret.
Rin lawk ang ngeiin minute 16-na lekah mualneitu lamin goal an khung nghal a, midfielder Ilkay Gundogan-a siamsak ṭha zet chu Alvarez chuan chiang mangkhengin goal-ah a chantir a, Fulham keeper Bernd Leno tan dan chi a ni lo.
Mahse, minute 10 a liam awrh a, rin loh angin thil a thleng. Portuguese full back Cancelo chuan Fulham forward Harry Wilson chu tharum hmangin a titlu a, red card a hmuh bakah penalty a chawi.
Fulham tan Manchester United midfielder hlui Andreas Pereira a lo pen chhuak a, Ederson rin lohna lamah petin, mikhual team tan siphurh a sut.
A changtupa
Fulham-in an hmachhawn team an hrechiang a, coach Marco Silva-a'n player tam zawk ni tawh mah se âtthlak taka nawr a tum lo a, an game 'plan' ngai ring chungin, tlarhnungah an bet thlap - player pakhata kim lo City tan a harsa hle.
Pep-a'n hliam dam kawr Haaland a mamawh tih inhriain minute 64-naah a luhtir a, Norwegian striker hian Kevin de Bruyne siamsak chu minute 74-naah a tauh lut nghal. Mahse, video assistant referee rawn a nih hnuah offside vangin pawmsak a ni lo.
Fulham an inrem ṭhat miau avangin player tlem zawk City an talbuai a, an hlauthawng hman. Mahse, hun pek belh minute nganaah Antonee Robinson-a'n thil ṭul lo a ti - De Bruyne a ti tlu a, Belgian midfielder hi a tluk thiam ve bawk avangin penalty a chawi!
City tan Haaland a lo pen chhuak a, kum 22 mi striker petna lam Leno-a'n ring dik mah se a dang lo - Haaland hian league match 12-ah goal 18 zet a khung ta a, a nep lo hle.
Minute 65 chhung 10 vs 11 a khelh a ngai chunga hnehna chan hi chu a danglam bik a ni. Minute 90-95 chhung kha kan khel ṭha a, target-a an shot chhunah goal kan chhuah mai a ni.
Hliam vanga Aleksandar Mitrovic (9 league goals) an chhawr thei lo kha an buai phah ngei a, mahse, kil tinah kan khel ṭha a ni. Player zawng zawng an thawkrim a, tha thawh vek an duh a, ka team-te ka chhuang a ni. - Pep Guardiola, City manager
Penalty pet dawn khan ka hlauthawng a, ka hringnuna ka nervous ber pawl a ni hial ang. A pawimawh ber erawh a ṭha thei ang ber kha hun hman kha a ni a, ka tiin ka hria. Goal ka khung thei kha ka lawm hle.
- Erling Haaland, City striker
Kan tan chuan a na a, lawm taka result pawm a harsa hle. Ka naute pawhin hrehawm an ti em em vek a, mahse, he hmun lo kal tura kan inpekna leh tumna a lang a, City laka chona huphurhawm tak chu thatho takin kan pawm a nih kha. Result duhawm lo ni mah se, hei hian min chher hriam ang. - Marco Silva, Fulham boss