Relegation zone tlansantu Foxes

Season bul ṭan ṭha lo tak Leicester City chuan relegation zone an tlansan ta a, an match hnuhnung pangaa an vawi thum chakna ni turin Everton chu 2-0 in an hneh.

Foxes tan Youri Tielemans chuan minute 45-naah goal mawi bik a khung a, hmanni lawka European club liante chil tiputtu theihna kha a la nei reng tih a pholang.

Brendan Rodgers-a enkawl team tan Harvey Barnes chuan minute 86-naah a khung ve leh bawk a, Goodison Park-a inkhelah Everton-in an mikhual an ngam lo.

Leicester goal khung pahnih hi James Mad-dison-a siamsak ve ve a ni a, English midfielder tan World Cup khelh beiseina a sang zel - hetihlai hian English striker Dominic Calvert-Lewin dinhmun a chiang lo thung.

Hliam vanga chawl reng Everton striker hi hliam vang bawkin minute 61-naah lakchhuah a ngai a, Foxes laka a chance duhawm tak chhawr lotu striker hi he thu buatsaih a nih lai hian a dinhmun a la chiang lo.

Everton-in an league match hnuhnung pahnihah Crystal Palace leh Fulham hmachhawnin, point li an hlawh chhuak a, coach Frank Lampard-a'n a naute chu khel ṭha reng tura a beisei thu sawi mah se a beiseina chu thamral tir a ni.

Foxes hi an vanneih zan ni se, goal tam zawk khung thei an ni hial - Patson Daka chuan uiawm takin a hlah a, Maddison woodwork a pet per bawk.