Brighton an chak leh ta

Chelsea laka goal li an khung hnuah Brighton & Hove Albion chuan goal thum an khung leh ta a, khualmualah Wolverhampton Wanderers chu 3-2 in an hneh.

Brighton tan Adam Lallana chuan minute 10-na lekah goal hmahruai khung mah se Wolves-in minute hnih hnuah Goncalo Guedes hmangin an sut - pound maktaduai 27.5 man winger tan tun season-a a goal hmasa ber a ni.

Wolves tan Ruben Neves chuan minute 35-naah penalty hmangin hmahruaina goal a khung zui. Mahse, Brighton tan Japanese winger Kaoru Mitoma chuan minute 44-naah si phurh a sut a, Mitoma laka a foul avangin Wolves defender Nelson Semedo chu hnawhchhuah a ni zui.

Brighton-in goal dang khung lawk lo mah se minute 83-naah Pascal Gross chuan chakna goal a khung a, Wolves-in coach thar tura Julen Lopetegui an lakluh thu an puan zanah hnehna an chang zo lo.

Real Madrid leh Sevilla boss hlui Lopetegui hian a pa damlohna avangin Wolves dawrna hmasa hi a hnar a, tunah erawh Premier League club coach a ni ta - World Cup zawh aṭangin Wolves a enkawl ṭan ang.

Brighton tana goal khat leh assist vawi khat neitu Lallana chuan, "Kan team-in goal khung kan harsat anga an sawi chu engmah a nih lohzia kan lantir. Kan vaia kan ṭan hlek chuan goal kan khung zel ang

"Ka ngaihdanah chuan Danny Welbeck ang striker hi English market-ah lei dawn ila, £80-90mtd tal sen a ngai, lei tur an awm lo," a ti a, a team a ringtawk hle.