I League champion tan ISL-ah hmun a awm e!

AIFF secretary general Dr. Shaji Prabhakaran chuan tun season I League champion chuan season tharah Indian Super League an khelh tur thu a sawi a, I League club tan chanchin lawmawm a ni.

Dr. Shaji chuan, "I League club-te hian participation fee pawh an chawi ve a ngai dawn lo. Mahse, ISL-a khel chuan premier one licensing criteria an paltlang a ngai a, I League champion chuan hei hi an paltlang ve a ngai dawn a ni," a ti a, ISL-a franchise fee hi vaibelchhe 15 vel a ni.

October 14, 2019 khan Kuala Lumpur-a Asian Football Confederation (AFC) hmunpuiah All India Football Federation (AIFF) chuan Indian football kalphung tur hi a lo puang tawh a, 2022-23 I League champion-in ISL an khelh tur thu an puang.

Ruahman dan chuan 2023-24 champion pawh ISL khel turin an tling dawn a, promotion leh relegation system chu 2024-25 season aṭangin hman ṭan tur a ni ang.

Dr. Shaji chuan, "Kalkawng tur duan sa ang khan kan kal a ni mai a, hei hian sawi neuh neuh awm zawng zawng a chingfel ang. I League club tan pawh chanchin lawmawm a ni," a ti a, AIFF marketing partner leh ISL enkawltu Football Sports Development Limited (FSDL) an rawn kher loh thu a sawi.

June thla khan I League club aiawhte chuan promotion chungchangah AIFF a ngawih reng avangin, Indian football buaina chingfel tura lo zin FIFA-AFC hruaitute chu an lo titipui tawh a, an beisei an hmu ta.

Zirtawpni khan Lalnghinglova Hmar kaihhruai AIFF League Committee chu online-in an committee bawk a, Hero I-League, Hero Indian Women’s League, Hero 2nd Division League leh Youth Leagues kalpui dan tur an rel.

I League hi November 12 khian khelh ṭan a ni dawn a, Gokulam Kerala leh Mohammedan SC ten match hmasa ber an khel ang. Aizawl FC chuan November 15, tlai dar 4:30-ah an match hmasa ber an khel dawn a, RG Stadium-ah Trau FC an mikhual ang - tun season I League hi home & away-a khelh tur a ni.

Tun season I League hi Eurosport leh Doordarshan Sports-in an pe chhuak dawn a, online-a en duh tan Discovery+ ah a en theih dawn bawk - club 12-in inelna an hmachhawn ang a, a hnuai lam pahnih an relegate dawn.