Leeds-in vanglai an chen

Liverpool lakah hun tawp dawnah chakna goal an khung a, Leeds United-in Bournemouth lakah comeback ropui an lantir leh ta - Inrinni zan khan an mikhual hi 4-3 in an hneh a, an vanglai an chen e!

Elland Road-a inkhelah Bournemouth defender Marcos Senesi chuan second 51-na lekah Crysencio Summerville lakah penalty a chawi a, Leeds tan Rodrigo chuan minute thumnaah penalty hi petin, goal-ah a chantir.

Mahse, Leeds hlim chhung a rei lo hle - Cherries tan Marcus Tavernier, Philip Billing leh Dominic Solanke ten an chhanglet a, minute 50 pawh a tlin hmain mikhual team hian 3-1 in hma an hruai der.

Mahse, Anfield-ah pawh beidawng duh lo Leeds hi mahni muala beidawng chi an ni lo - bench aṭanga luhtir Sam Greenwood chuan kum 20 lek ni mah se Premier League khel turin a inpeih tawh tih pholangin, minute 60-naah mawi zetin si phurh a rawn sut ṭhen.

Minute riat a liam a, Leeds tan captain Liam Cooper chuan minute 68-naah si phurh a sut zo a, hun tawp nan minute ruk chauh a awm tawh tihah Summerville chuan chakna goal a khung zui.

Leeds United manager Jesse Marsch chuan, "Khelh ṭhat chhunzawm zel hi kan duh chu a ni mai a, manager tan chuan hlauthawng taka awm reng ai chuan a ṭha a ni. Mahse, awlsam tak hian kan chak ve ngai lo ni berin ka hria," a ti a, February-a Leeds a enkawl hnua Premier League match 25-a vawi riat an chakna a ni.