Pique-a'n football leh Barca a mangṭha!
Barcelona legend Gerard Pique chuan Nou Camp-ah Barcelona tana a match hnuhnung ber a khel zo ta! Catalan club tan chauh a ni lo, Spanish defender hian football khelh a chawlhsan dawn - mittui nen khelmual a chhuahsan.
Barca hian Thawhlehni zanah Osasuna an lenchilh dawn, hemi hnu hian Pique-a football zinkawng chu a tawp fel ang. Osasuna lakah a inlan dawn em tih a chiang lo, chuvangin Barca ṭantuten Inrinni zan inkhelh ban khan an thlah fel.
Pique tan an chak
Champions League lamah beisei phak lo mah se Barcelona hi La Liga lamah chuan a che ṭha tluang viau. An mikhual Almeria 2-0 in an hneh, an defender ropui Gerard Pique hun hnuhnung a nih avangin goal an chhuah lo hi a lawmawm zual ang.
Catalan club tan hian Ousmane Dembele leh Frenkie de Jong ten second half-ah goal khat ve ve an khung a, mikhual team lamin a chhanletna tur an nei lo - UCL nen chuan a boruak a inang rih lo hle.
Xavi enkawl Barcelona hian La liga match 13 aṭangin point 34 an hmu a, table hmahruaitu an ni rih. Champion lai Real Madrid aiin match khatin an khel hnem thung, zaninah Real hian Rayo Vallecano an hneh a nih chuan a chung berah an lawn leh ang.
A liam ta
Minute 84-naah Gerard Pique hi thlak a ni a, stadium khat tlata inkhel entu pungkhawm chuan ding chungin zahna chibai an buk. Club tana a thil lo tih tawhte avangin zah leh ui taka chunga thlah hi a phu reng a ni.
Kum 35 mi Pique chuan, "He hmunah hian ka piang a, ka hun tawp hmanna tur hmun pawh a ni. Kum a lo tam ve zel a, a chang chuan hmangaihna vanga thil kan kalsan a ngaih chang a awm. Barca hi ka hmangaih, chuvangin kalsan hun a ni.
"Engtik niah emaw chuan he hmunah hian ka lo kir leh ang, tun hi in mangṭha pumhlumna hun a la ni lo," a ti, football khelh chawlhsan pawh ni se Barcelona tan hna thawh chu a la tum reng, club hruaitu a ni chho zel a nih pawhin a mak lo ang.
Legend Pique
Spain international hlui Pique hian Barcelona tan thla 18 daih contract a la nei, a hlawh lak hmabak hi a la dawn lo - tun hma lama a hlawh an batsak pawh a ngaidam niin khawtlang media-te chuan an tarlang bawk. Sum lama talbuai Barca tan chuan hriatreng tawh tur a ni dawn.
Kum 2008 khan Barcelona hi a zawm a, inelna hrang hrangah match 616 khelin nomawi 30 a chawi pui. Catalan club tan hian match khel hnem pangana a ni phak, a chungah Lionel Messi (778), manager Xavi Hernandez (767), Sergio Busquets (694) leh Andres Iniesta (674) te chauh an awm.
Club tana nomawi chawi hnem lamah pawh Messi (35) leh Iniesta (32) te chauh a tluk lo, club lama a hlawhtlin bakah Spain tan World Cup 2010 leh Euro 2012 nomawi a chawi a, khawvela footballer hlawhtling berte zinga mi a ni kumkhua tawh ang.