Knicks laka record siamtu Celtics

Boston Celtics chuan nimin zing khan New York Knicks 133-118 in an hneh, he inkhelah hian Celtics player zawng zawngin 3-points an nei vek a, hei hi an club record thar a ni nghal.

Jaylen Brown leh Jayson Tatum ten 3-points vawi ruk ve ve an nei a, player dang pasarihte pawhin vawi khat tal 3-points an nei vek. Knicks lakaa 3-points an neih zawng zawng hi vawi 27 lai a tling.

NBA match khata 3-points nei hnem ber chu Milwaukee Bucks an ni. Bucks hian 2021 November 10 khan Miami Heat lakah vawi 29 ngawt an lo nei tawh a, an record hi Celtics hian vawi hnihin an phak lo deuh.

Inkhel dangah Brooklyn Nets chuan Charlotte Hornets lakah 98-94 in hnehna an chang a, an thiampuipa Kevin Durant chuan point 27 neiin hnehna an chan theih nan a thawh hlawk fal hle.

Nets hian season bul an ṭan fuh lo, match 10 an khelh aṭangin vawi li chauh an la chak - Eastern Conference table-ah 10-na an ni mek. An player ṭha Kyrie Irving hrem a nih hnuah match hnih a zawnin an chak a, chanchin lawmawm bik a ni ang.