Atalanta hnehtu Napoli

An player ṭha rual an chhuak suau a, hniam lam pan tura ngaih an nih laiin Napoli hi hma lam panin an kal zel si. Serie A hmahruaitu hian Inrinni zan khan an mikhualna ramah Atalanta chu 2-1 in an hneh.

Inkhel dangah AC Milan 2-1 in an chak bawk. Champion lai hian an mikhual Spezia hneh turin hun tawp dawn a Olivier Giroud goal khung an mamawh a, champion nomawi humhim an tumna a la nung zel.

AC Milan aṭanga loan hmanga Spezia zawmtu Daniel Maldini-a'n a club pangngai lakah goal a khung a, ani hian Theo Hernandez-a goal khung a sut a, hun tawp dawnah Arsenal leh Chelsea striker hlui Giroud chuan chakna goal a volley lut.

Spezia tana goal khungtu Maldini hi legend Paolo-a fapa kha a ni a, a pu Cesare Maldini pawhin Serie A goal a lo khung tawh. Italian football inelna sang berah hian pafa inthlah chhawng pathum goal khung thei record a lo siam tawh a ni.

Stefano Pioli enkawl Milan hian Serie A match 13 aṭangin point 29 an hmu a, hmahruaitu Napoli chu khelh zat inangah point rukin an phak lo, an hnuaia awm Atalanta aiin point hnihin an sang thung.

Hmahruaitu Napoli hian goal an chhuah hmasa, minute 19-naah Atalanta tan Ademola Lookman chuan penalty aṭangin goal a khung, striker ṭha Victor Osimhen-a'n hand ball vanga a chawi a ni.

Chawlhlawk hmain Naples club hian goal hnihin an chhanglet hman, penalty chawitu Osimhen-a'n si phurh a sut a, Nigeria international hian Elif Elmas tan a siamsak bawk a, dinhmun hniam zawka an din hnuah an tho chhuak.

Napoli hian 1989-90 hnu lamah Serie A nomawi an la chawi leh lo, an champion hnuhnung ber hi Diego Maradona hunlai daih tawh kha a ni. Tun season-ah nomawi an beisei ve leh mek, a zawnin league match vawi kua ngawt an chak zawn tawh a, champion beiseina sang tak nei.

Nizan khan Juventus leh Inter Milan an inhmachhawn a, inkhel dangah AS Roma an inlan bawk - result kan hre hman lo.

Inkhel Results
Udinese 1 - 1 Lecce
Empoli 1 - 0 Sassuolo
Salernitana 2 - 2 Cremonese
Atalanta 1 - 2 Napoli
AC Milan 2 - 1 Spezia