Bayern leh Dortmund an chak

Bundesliga-ah Bayern chuan Inrinni zan khan an khingpui Hertha Berlin 3-2 in an hneh a, table chung berah an awm. Nizan khan Union Berlin leh Bayer Levkerkusen an inkhel a, Union Berlin hi an chak a nih chuan a chung berah an awm leh thei ang. Inkhel dangah Borussia Dortmund-in Vfl Bochum 3-0 in an hneh bawk.

Olympiastadion Berlin-ah Bavarians tan Manuel Neuer a rawn kir a, inkheltir lamah Neuer-a'n hna nei mah se Jamal Musiala hmangin mikhual team-in an khung hmasa zawk. Minute 12-naa Musiala goal hi Sadio Mane siamsak a ni.

Bayern tan Eric Maxim Choupo-Moting-a'n season ṭha tak a hmang a, goal hmaah a ke a hmui hle. Cameroon internaitonal striker hian tun season-ah goal 10 a khung tawh a, Hertha lakah hian goal hnih khungin Bayern-in 3-0 in hma an hruai.

Hertha Berlin-in first-ah vek Dodi Lukebakio leh Davie Selke penalty hmangin siphurh an sut ṭhen a, halftime-ah 3-2 ni leh tawh mah se second half-ah goal a luh belh lo. Choupo-Moting hattrick siamna tur goal chu Alphonso Davies offside vangin pawm a ni lo a, Bayern-in point thum an hmuh nan keeper Neuer a a che ṭha bawk.

Borussia Dortmund-in Bochum hneh turin harsatna an tawk lo. Rawlthar duhawm Youssoufa Moukoko-a'n goal hnih a khung bakah Giovanni Reyna-a'n penalty aṭangin a khung bawk.

Dortmund forward Moukoko hi kum 17 leh ni 350 mi chauh a ni a, Bundesliga-a goal 10 khung thei naupang ber a ni. Germany squad puan hunah pawh Hansi Flick-a'n Moukoko hi a telh ngei a rinawm.