Chak la nei lo NorthEast United!

Kartawp ISL inkhelah mak tih tur a awm lo - tlawm ṭhang NorthEast United leh East Bengal an tlawm leh tawh a, Hyderabad chuan 1-0 in Odisha FC an hneh bawk.

Inrinni zan khan tun season-a chak la nei lo NorthEast United-in Kerala Blasters an mikhual a, South Indian club hi match thum zet a zawna tlawm tawh an nih avangin Highlander hian chak an beisei ngam.

Mahse, Indira Gandhi Athletic Stadium, Guwahati-a inkhelah first half chhungin goal a lut lo a, second half-ah mikhual team tan Dimitrios Diamantakos chuan goal hmahruai khungin, Sahal Abdul Samad-a'n goal hnih a khung ve leh a, 3-0 in Kerala Blasters an chak.

NorthEast tan winger Romain Philippoteaux chuan minute riatna lekah goal khungna remchang nei mah se a chhawr lo a, Ligue 1 club Brest aṭanga Highlander pantu hian woodwork a tih per - goal khat an chhuah hnuah Imran Khan leh Emil Benny ten an team kaihthawhna remchang an neih an chhawr lo bawk.

Highlander tan Joe Zoherliana'n bul a ṭan a, Blasters tan K. Lalṭhathanga (Puitea) chu bench aṭanga luhtir a ni bawk - NorthEast hi tun season-a match nga an khelh tawhah an la tlawm vek!

Inrinni zan inkhel hmasa zawkah Hyderabad chuan 1-0 in Odisha FC an hneh a, Hyderabad khawpuia inkhelah Mohammad Yasir chuan inkhela goal awmchhun a khung - Odisha tan Jerry Mawihmingthanga'n inkhel bul a ṭan a, bench aṭangin Isaac Vanmalsawma, Paul Ramfangzauva leh Isak Vanlalruatfela te an lut bawk.

Bench aṭanga a luh hnuah Isak-a'n si phurh sutna remchang nei mah se Hyderabad keeper Laxmikant Kattimani chuan ṭha zetin a dansak.

Zirtawpni zan khan Chennaiyin FC chuan 1-0 in East Bengal an hneh bawk a, Salt Lake Stadium-a fans 17,000 chuang hmaah Vafa Hakhamaneshi chuan inkhela goal awmchhun a khung. Kolkata club tan ṭum dang ang thoin Lalchungnunga leh Jerry Lalrinzuala ten inkhel bul an ṭan a, an team erawh an chhan zo bik lo.

Iranian centre back Vafa Hakhamaneshi hian goal a khung hnuah a kawr a hlim a, #WOMEN #LIFE #FREEDOM tih a inziak - yellow card a lo hmuh tawh avangin red card pek a ni.

Vafa chuan, "Kan ram mipuite tan a ni," a ti a, Iran-a anti-hijab protest kal meka an ram hmeichhiate a thlawpna a nih thu a sawi.