Mizoram Police-in semifinal an thleng ta

Mizoram Premier League Season 6-ah Mizoram Police-in coach Lalbiaksanga Colney hnuaiah harhtharna tak changin semifinal an lut.

Nimin tlai Lammuala inkhel­ah Police hian Lalfakzuala hattrick, F. Lalrinpuia goal hnih leh Lalbiakhlua goal khat hmangin Dinthar FC 6-1 in an sawp.

MPL champion hmasa ber Maimawms erawh relegate thei dinhmunah an ding zel a, nizana Chanmari West leh Aizawl FC inkhel result-in an hma lam hun a hril ang.

Chak tur a hriat hma
Mizoram Police-in minute lina lekah Valpuia hmangin hma an hruai nghal a, hemi hnu hian Armed Veng tlangval Lalbiakhlua'n a club hlui lamah thun leh nghal zat mah se offside vangin pawm a ni lo.

Dinthar beiseina siam tur­in Samuel Laltlanthanga'n freekick aṭangin a khung a, amaherawhchu Dinthar tlangval hian hmahruaina tur chance ṭha a hlah avangin an beisei a tawp zui.

Police an hrang zui a, Lalfakzuala'n first half tawp hmain goal hnih a khung a, Valpuia'n injury time-ah a goal hnihna a khung leh bawk. Dinthar tan Fakzuala leh Valpuia te an thiam hret a, first half a tawp meuh chuan Police-in 4-1 in hma an hruai tawh.

A goal belh
Second half minute hnihna lekah Police forward Fakzuala'n hattrick a siam nghal a, Armed Veng tlangval hian a class san zia a pholang.

Police-in Dinthar aṭanga an lakluh Hlutea an chhawr ṭangkai a, Armed Veng tlangval hian cool takin Police goal rukna a khung.

BS-a Colney-in player pawimawh Valpuia leh V. Lal­­ṭanpuia te a hah­damtir a, chance ṭha la nei mah se goal an khung belh tawh lo.

Thil ropui chu
Mizoram Police ṭantute 'Lalpa'n thil ropui min tihsak e' tiin an zai rual a, season ṭan­ tirha an dinhmun leh tuna an awmna thlir hian an thlen chin hi a ropui hle.

Police hian MPL6 match hmasa pangaah point khat chiah an hmu a, table mawngphahah awmin tla tura ngaih an ni hman.

Police-in him duhin season liam taa Bethlehem Vengthlang final thlenpuitu Lalbiaksanga Colney an lalut a, Armed Veng pa BS-a hnuaiah Police hian match 8 aṭangin point 19 an hmu a, match khat khelh hmabak la awm chungin semifinal khel turin an tling.

BS-a hote hian match hnu­hnung berah Chhinga Veng FC an hmachhawn dawn a, he result hian semifinal-a an khingpui tur a hril ang.

Police hian point 20 hmuin pathumnaah an awm mek a, table chung lama awm Chhinga Veng leh Aizawl FC pawhin an tum châk lo ang.