Mary Kom-i'n beisei a nei sang

Asian Boxing champion Mary Kom chuan tun thla tawp lama neih tur 2017 AIBA Youth Women's World Championship-ah India nula ten medal an hlawhchhuah theih ngei a beisei thu a sawi.

World champion vawi nga ni tawh Kom-i chuan, "Boxer chhuak thar ṭha tak tak kan nei a, an finna leh huaisenna chu boxing ring chhungah an lantir a ngai. An theihna a sang a, an thiamna an hman chhuah theih nan chuan huaisenna an mamawh," a ti. AIBA Youth Women's World Championship hi November 19-26 chhungin Guwahati-ah neih tur a ni ang.

Manipuri boxer hi tun hma chuan 51kg category-ah a inlan ṭhin a, tun hnaiah fa pathum a neih hnuah rawn kir lehin 48kg category-ah inlanin India tan Asian level-ah gold medal a hnek chhuak lehnghal a ni.

Kum 34 mi Kom chuan, "Ka dam ṭha a, training nei ṭhain ka fitness a ṭhat phawt chuan tu pawh ka hneh theih ka ring. Olympic-ah 48kg category an siam ta hi a lawmawm a, a hun lo thlen hun tur la rei deuh mah se beiseina min siamsak," tiin hmathlir thui tak a la neih thu a sawi.