Croatia leh Swiss tan World Cup a hnai
Croatia leh Switzerland te chuan FIFA World Cup 2018 khelhna tur Russia chu an ke dinglamin an rap ta. Ningani zana playoff khelhah Croatia hian an mikhual Greece 4-1 in an sawp a, inkhel dangah Swiss chuan khualmualah Northern Ireland chu si khat saiin an va luhchhuah bawk.
Croatia hian kum 1998 khan a vawi khat nan World Cup an khel a, nakkum atan hian an inpet tling leh a nih chuan a zawna vawi nga an khelhna tur a ni ang. Northern Ireland erawh kum 1986 hnua a vawi khat nan World Cup khelh an duh a nih chuan khualmualah Swiss an hneh let theih a ṭul dawn a ni.
Croatia chak chiang
Zagreb-a inkhelah mualneitu Croatia lamin bul an ṭan fuh hle a, Greek keeper Orestis Karnezis-a penalty chawi chu Real Madrid midfielder Luka Modric chuan khungin minute 13-na lekah hma an hruai nghal.
Croatia lam an phur a, Greece an inring hman lo. Goal hmahruai luh aṭang minute ruk hnu lawkah goal bula ven loha awm Nikola Kalinic chuan an hmahruaina a sawh nghet. Chawlhlawk hmain mikhual team tan Sokratis Papastathopoulos-a'n tauh lut a, 2-1 chiah a ni.
Amaherawhchu, nipui bazar laia Manchester United-in lakluh an tum Inter Milan midfielder Andrej Kramaric chuan Hoffenheim forward Andrej Kramaric chu chiang zetin a tauh lut a, chawlhlawk a nih meuh chuan 3-1 in hma an hruai a, second half-ah Greece defender Sime Vrsaljko tihsual vangin Kramaric chuan an goal lina a khung bawk.
A la tawp lo
Croatia coach Zlatko Dalic chuan an mualah nuamsa takin hnehna chang mah se a la tawp loh thu sawiin, "First half chauh a la ni, inkhel a la tawp lo a, hahchawlh hman kan ni lo," tiin a sawi. Ram pahnihte hi Pathianni zan dar 1:15 hian Greece-ah an intawng leh ang.
A naute khelh dana a lawm thu sawi zuiin Dalic chuan, "Match ropui tak kan khel, ka naute hian an tihtur an hrechiang a, hrilh nawn an ngai lo. Mipui ṭawiawmna kan hmu ṭha a, tun ṭum bik atan chuan kan duhthusamin thil a thleng a ni," a ti. Dalic hian an ram team hi match hnih a kaihhruaina chiah a ni a, a match hmasa zawkah Ukraine 2-0 in a hneh tawh bawk.
Greece lakah Croatia khan ball possession 59% neiin inkhel an thunun tluan thei a, La Liga leh Serie A star ni phak Modric leh Perisic te chu midfield thununtu niin an inkhel khaikhawmtu an ni bawk; Atletico Madrid right back Vrsaljko chuan goal venhim leh a nawr kawngah a ṭhiante a pui ṭhain a langsar hle bawk a ni.
Swiss chakna penalty
Windsor Park-ah Northern Ireland mipui an ṭap a, Switzerland lamin hnehna hlado an chham thung. First half-a goal a luh loh hnuah minute 57-naah Ireland defender Corry Evans chuan penalty chawiin AC Milan defender Ricardo Rodriguez chuan Swiss goal neihchhun a khung.
Switzerland hi Group B-ah awmin match kua an khelhah vawi ruk an chak thei a, match hnuhnung ber an khelh hma thlengin hmahruaitu an ni thei. Mahse, an group match tawp berah Portugal chu 2-0 in an ngam lo a, playoff an khelh a ngaih phah - Russia panna ticket nei turin Pathianni zanah an goal an venhim a tawk tawh ang.
Swiss tan hian Arsenal midfielder Granit Xhaka leh Stoke City thiampuipa Xherdan Shaqiri ten an goal hnihna khung theihna hun ṭha nei mah se an vannei tawk lo a, goal bar hrulah an pet chhuak ve ve a ni.
Midfielder Shaqiri chuan, "Ball kan chang hnemin inkhel kan thunun a, hunṭha kan insiam bakah goal kan khung bawk, Northern Ireland ai kha chuan chak tur zawk kan ni. Ka hun ṭha neih kha goal chhunga pet theihna tur a ni, min tibuaitu an awm lo a, ka duhthusamin pet thei mah ila ka vannei tawk lo a ni," tiin a sawi.
Swiss lamin hnehna chan an phu thu an sawi a, hetih lai hian Northern Ireland manager Michael O'Neill ngaihdan erawh a dang. O'Neill chuan penalty an chawi chu awm lo a tih thu sawiin, "Corry khan a banin ball a khawih lo, a hnungah an pet per zawk mai a ni. Referee thutlukna kha pawm thiam a harsa hle a, khualmualah goal khung ngei tumin kan bei dawn a ni," tiin a sawi.
World Cup Playoff
Ningani zan Inkhel Results
First Leg
Croatia 2 - 0 Greece
Northern Ireland 0 - 1 Switzerland
Second Leg
Pathianni zan
Switzerland 10:30 PM Northern Ireland
Greece 1:15 AM Croatia