League round hmahruaitu Chhinga Veng
Mizoram Premier League Season 6-ah Chhinga Vengin hmahruaina nemnghet turin Ningani zan khan Bethlehem Vengthlang FC 1-0 in an hneh a, Chhingcows hi anmahni hnaih bertu Aizawl FC-in an umpha thei tawh lo.
Lammual zan inkhel a nung tawk lo chungin team ṭha zawkin hnehna an chang a, Chhinga Veng chakna goal hi minute 42-naah Lalrammuanpuia'n (Apuia) mawi taka a club hlui lama a khung a ni.
1-na Chhinga Veng
Chhinga Vengin match 13 khelh aṭangin match riat an chak a, vawi thum an khingpui inhnehtawk puiin point 30 an hlawh chhuak a, Aizawl FC chiah an hneh lo.
Chhingcows coach Lalsangzuala Hmar chuan inkhelh hmain Vanglaini hnenah league round-a pakhatna nih an duhthu a hrilh a, minute 90 chhung a club hlui BVT nena an inbeih hnuah an duh ang ngeiin hmahruaitu an ni a, semifinal-ah palina an hmachhawn ang. Aizawl FC-in nizana Chanmari West an hneh a, an match hnuhnung bera Ramhlun North an hneh pawhin Chhinga Veng point hmuh zat hi an pha thei tawh lo.
Chhinga Vengin MPL ṭan hmain MFA Super Cup leh I Day Football an chawi tawh a, an record thlir chuan tun season-a team ṭha ber an ni. Amaherawhchu MPL season chawhnu lamah erawh Sanga hote hi an kal fawr thei ta bik lo a, match khat khelh hmabak awm mah se MPL2 leh MPL3-a hmahruaitu Chanmari FC (35 pts) leh Aizawl FC (35 pts) te chu an pha thei dawn ta lo.
Kan lawm - Sanga
Chhinga Veng coach Lalsangzuala Hmar chuan, "Match khat khelh tur la awma hmahruaitu kan ni thei hi a lawmawm hle. Hahdam zawkin training kan nei thei a, semifinal khel turin kan inpuahchah thei tawh. Chutihrualin inthlahdul erawh a la thiang lo. Kan match khelh hmabakah pawh hian kan zir ang te lantir tumin theihtawp kan chhuah zel ang," tiin Vanglaini a hrilh.
Sanga chuan sawi chhunzawmin, "Palina kan hmachhawn dawn a, duhthlang thei pawh ni ila thlan tur ka hre chuang lo. MPL club zawng zawng hi chu an ṭha vek a. Kan hmaa awm apiang hmachhawn thei tura kan inpeih a ṭul a ni," tiin a sawi.