City leh Amazon Prime inrem

Manchester City leh Amazon Prime chuan behind-the-scenes TV series atan 2017-18 season chhung atan inremna an ziak a, Amazon Prime hian City chungchang chhuah manah hian pound maktaduai 10 an pe ang. He series hi nakkumah chhuah hman tura ruahmanna siam a ni.

City hian tun hnaiah kum khat chhunga an club sum lakluh chu pound maktaduai 473 a tlin thu an puang a, an club chanchina kum khata sum an lakluh hnem ber ṭum niin a punna hi 21% a ni. City chief executive Ferran Soriano chuan, "Amazon Prime Video hi kan tan chuan project ṭha tak a ni a, Manchester City-in season kan hman dan uluk taka phochhuahna tur a ni," tiin a sawi.

City hi Abu Dhabi sumdawng hausa Khaldoon al-Mubarak-a'n May 2008-a pound maktaduai 210 senga a lei hma chiah kha chuan season khat pumpuia an sum lakluh kha pound maktaduai 82.3 a ni a, tunah erawh khelmual chhung mai ni lo a pawn lam thlengin hlawkna an tel ṭan.

Amazon Prime Video hi internet lama 'on-demand service' an tih ang hi a ni a, he Amazon Prime Video subscribe tute chuan television show leh video te chu an lei thei a ni. Amazon Prime Video hian subscriber an neih zat leh sales an neih zat an tarlang ngai lo a, tun hnaiah NFL leh ATP World Tour te chu live stream-a tihchhuah turin inremna an neihpui tawh.