ATP Finals khel turin Nadal a inpeih

Carlos Moya chuan a player Rafael Nadal chu ATP Finals khel tura a inpeih thu a sawi. World number 1 Nadal hi kar hmasa khan a khup hliam vangin Paris Masters quarterfinal an khelh hmain a inhnukdawk a ni.

Season thar aṭanga Nadal coach puitling ni tur Moya chuan, "Rafa dinhmun a ṭha, a khup pawh ngaihtuahawm a ni lo. Kar hmasa lama a inhnuh­dawh chhan kha chu nat belh a hlauh vang a ni," tiin a sawi.

Spain tlangval Nadal hian tun season chhungin a vawi 10 nan French Open no­mawi a chawi a, Grand Slam hnuhnung ber US Open-ah khan a champion bawk.

Grand Slam vawi 16 cham­pion tawh Nadal hian world number 1 ni chungin season a khar dawn tih a chiang tawh a, London-a khelh tur ATP Finals-ah hian Boris Becker Group-ah awmin David Goffin (Belgium), a vawi khat nana inlan tur Grigor Dimitrov (Bulgaria) leh player beiseiawm Dominic Thiem (Austrian) te nen an awm khawm. Nadal hian a match hmasa ber atan Pathianni zan dar 1:30-ah David Goffin a hmachhawn ang.