Joshua v Wilder Kum 2018-ah an inhnek dawn–Eddie Hearn

Khawvel ngaihven boxer rothap pahnih Anthony Joshua leh Deontay Wilder te chu vantlang hriata an incho reng hnuah Joshua promoter Eddie Hearn chuan kum 2018-ah an inhnek ngei tur thu a sawi.

Hearn hian Ningani khan Wilder-a promoter te chu USA-ah titi puina a nei a, Wilder chu a sum phut chinah a phu tawk hre turin a ti nghal bawk. Hearn chuan, "Mumang leh a tak ram inkarah kan len a ngai a ni ber a, chu chu kan ti thei a nih chuan boxer pahnih inhmachhawn theih lohna chhan tur ka hre lo," a ti.

Enge a awmzia?

WBC heavyweight champion Deontay Wilder hi heavyweight boxer 'hot' ber pawl ni mek mah se Anthony Joshua erawh a la tluk lo hle. Ring chhungah tu nge ṭha zawk? tih chu boxer pahnih intawn hunah chhanin a awm chauh dawn a, sum leh lar lamah erawh Wilder hian Joshua a la phak rih lo. Hei vang tak hian Joshua-a'n Wilder a mamawhna aiin Wilder-a'n Joshua a mamawhna a sang zawk a, awlsam taka lang nghal chu Joshua-a'n sum a hlawh hnem zawk ang.

Eddie Hearn chuan, "Anthony vanduaina chu amah hmachhawn duhtute hi an phu tawk aia tam pawisa a pek zel a ngai hi a ni. Deontay hi a phu tawk pawisa a hmaah kan chhawp a nih chuan an inhmachhawn lo ang, a chhan chu Deontay hian inzahlohnaah a ngaih dawn vang a ni. Hei vang tak hian a phu tawk aia tam pawisa kan pek a ṭul dawn a ni. Engpawhnise Deontay hi boxer zah phu tak a ni a, fighter ropui leh champion a ni a, mahni inthehlar pawh thiam tak a ni. Pawi ka tih ber chu amah ti phur thei tur promoter a nei lo hi a ni," tiin a sawi.

A thleng ngei dawn

Ningania Wilder-a aiawhte nen indawrna an neih hnuah Hearn chuan boxer pahnih aiawhte ve vein inhnek chu thlen tir ngei an duh thu a sawi a, kum 2018-ah an intawn ngei tur thu sawi mah se nakkuma Joshua hmachhawn hmasak ber tur a nih leh nih loh thu erawh a sawi thei lo. Mahse, Hearn chuan boxer pahnih intawng chu boxing khawvela inhnek ropui ber tur a nih thu sawiin, "Joshua hian Wilder hmachhawn ngei a duh a, chutiang bawkin Wilder hian a duh a ni," a ti.

Hearn chuan, "Kum 2018-ah he inhnek hi a thleng ngei dawn a, chutah chuan buaina tur a awm lo. Boxer pahnih inchona chungchangah twitter lama tweet maktaduai khat chuang i hmu a nih chuan engtinnge boxer pahnih inhnek hi i thlentir loh theih ang?" tiin a sawi–boxer pahnih hi an inhmachhawn a nih chuan heavyweight boxing-a title lian tham pali zinga pathum chu a chak zawkin an kawl dawn tihna a ni a, WBO kawnghren chu Joseph Parker-a'n a kawl mek.

Joshua chhangtu Fury

Joshua leh Wilder boruak kara thawm lo nei ve reng chu Tyson Fury a ni. November 2015-a Wladimir Klitschko a hneh khan Fury hian major title pali chu a kawl vek a, mah se a hnu lamah damdawi hman phal loh hman chungchang leh rilru lam harsatna a tawh avangin a inhnek leh tawh lo. Tun hnaiah Joshua chona thu a chhak chhuak a, hei hi vawi 20 inhnek a hmachhawna a khingpui knockout vektu Joshua chuan, "Ring chhunga lut tlak khawpin awm phawt rawh," tiin Fury chu 'thau' lutuk tiin a chhang.

Mahse, Fury chuan Joshua hi chhangletin, "Anthony Joshua hei hi lo hre rawh, nang hmachhawn tur hian fit taka awm ka mamawh lo. Palian satliah ve mai i ni," a ti. Joshua promoter Hearn pawhin, "Fury chuan Joshua hmachhawn hi lo theihnghilh rih rawh se. Ring chhungah lo kir leh se la, Joshua hmachhawn thei turin midang hneh leh phawt rawh se. Boxer ropui tak a ni tih ka hria, mah se mi tam tak hi chu an ṭawngah an thamral ṭhin. Joshua a hmachhawn duh tak tak a nih chuan lo kir leh phawt rawh se," tiin Fury chu ring chhung rap leh phawt turin a ti.