Hmasawnna tur ka la ngah–Sindhu

PV Sindhu chuan world number 1 nih chu a duhthusam ni mah se a tum ber a nih loh thu a sawi a, ranking-a pakhatna a nih hmain hmasawnna tur a la ngah thu a sawi chhuak.

Kum 22 mi Sindhu hian nikum khan Rio Olympic-ah silver medal a dawng a, Indian shuttler zingah Olympic silver medal vaw chhuak thei hmasa ber a ni. Kuminah pawh Sindhu hi court chhunga player hmuhnawm a nih chhunzawm–Badminton World Championship-ah silver medal bawk a dawng. Korea Open Super Series title lain world number 2 a ni phak hial.

Amaherawhchu, karhmasa a khelh zawh tak Senior National Badminton Championship final-ah tun hnaia result ṭha nei tlem zawk Saina Nehwal hneh loin ranking-ah chuan Saina hi 11-na a ni a, inkhel boruak sangah tawnhriat ngah zawk Saina a dingchang. Saina hnuah hian India nula zingah world number 1 ni leh thei an la awm lo.

Hyderabad shuttler Sindhu chuan, "Ranking-a a sang 20 chin hi chu kan danglamna a tam lo, khelh dan leh kalphung tlem a danglam a ni mai a, vanneih ni chuan inhneh thei vek kan ni. Ka ranking-ah hian ka lungawi a, hmasawn zel tur ka nih rualin a chung bera awm hi ka tum ber a ni hran lo, ka thlenchin aṭang hian hmasawnna tur ka la ngah hle," tiin a sawi.