Hamilton dahsangtu Alonso

Formula 1 world champion ni tawh Fernando Alonso chuan tun season champion Lewis Hamilton chu khawvel driver ropui berte zinga mi a nih thu a sawi chhuak.

Mercedes driver Hamilton-a'n a elpui Sebastian Vetten hnehin a vawi li nan world champion a ni a, tun season intlansiak tur 20 awm zinga 18 an tlan zawh chuan a champion fel der tawh. Pathianni zan dar 9:30-a tlan tur Brazilian Grand Prix leh season kharna Abu Dhabi Grand Prix-in driver championship-ah nghawng a nei tawh lo.

McLaren team lama a awmpui tawh Alonso chuan a teammate hlui chungchang sawiin, "Lewis hi khawvela driver ṭha berte zinga mi a ni tih ka hria. McLaren car kan khalh dun lai khan kan team-in harsatna kan tawk a, khati chung pawh khan team ṭha dangte a elphak thei reng," tiin Hamilton chu car chak lo deuh a khalh lai pawha driver ṭha a nih thu a sawi.

Tunkar tawpa Brazilian Grand Prix an tlanna tur Autodromo Jose Carlos Pace tlankawng hi kum 1940 a siam niin entu mipui 60,000 lenna a ni. Tlankawng thui zawng hi 4.309 km niin kawng kawi 15 a awm.