MBBA Cup 2017 Vikings-in Mission VT hneh

Mizoram Basketball Association buatsaih MBBA Cup 2017 chu Hawla Indoor Stadium, Republic Vegthlangah khelh chhunzawm zel a ni a, Ningani zan khan Mizoram Super League champion Mission Veng Vikings chuan an veng ṭhenawm Mission Vengthlang Hollows chu 80–76 in an hneh a, inkhel dangah MSL 1 finalist Zarkawt BCA chuan Republic VR4 lakah 84-67 in hnehna an chang bawk.

Aizawl District Bas-ketball Association (ADBBA) a din hma chuan MBBA hnuaia division awm zawng zawngin MBBA Cup hi an khel ṭhin a, tunah erawh chuan ADBBA a din tak avangin MBBA lam pawhin Cup khelh dan phung hi tidanglamin MBBA Cup 2017 khel tur hian MSL Club, Assam Regiment Center Team, Shillong, Assam Rifles Team, Mizoram, Aizawl District Basketball Association (ADBBA) Cup Champion leh pahnihna bakah Aizawl District ni lo District dang zawngin District Team indina khelh theih turin a ruahman a ni.

Tun inelnaah hian MSL club awmsa bakah kaithar Republic VR4 leh ADBBA champion Zarkawt Serpents leh pahnihna Ramhlun Sporting club an inlan; MBBA Cup-ah hian state pawn leh Mizoram district dang aṭangin team inlan tura beisei ni mah se Aizawl district aṭang bakin inlan thei an awm lo.

Ningani zan Results
Zarkawt BCA 84–67 Republic VR4
Mission Veng Vikings 80–76 Mission Vengthlang Hollows
Zanin Inkhel Tur
05:30 PM Zarkawt BCA vs Zarkawt Serpents
07:00 PM Ramhlun SC vs Khatla TBL
November 14, Thawhlehni
01:30 PM Zarkawt Serpents vs Republic VR4
05:30 PM Tuikual South vs Zarkawr BCA
07:00 PM Khatla TBL vs Mission Veng Vikings