Arsenal lakah Chelsea an zawr

Goal khat chauh a lut a, mikhual Arsenal chakna zat chu 1-0 chauh a ni. Stamford Bridge-a inkhel entute erawhin Gunners-in kawng engkimah Chelsea an awp bet tih an hmu, goal lut zatin team pahnih dinhmun inthlauhna a sawifiah phak lo.

Mikel Arteta naute hian Gabriel Magalhaes-a goal khat hmangin Blues an hneh. Premier League champion lai leh hmahruai lailawktu Manchester City an nek chhuak a, tunah chuan Arsenal hi a chung berah an awm leh ta - thlasik kan hnaih ta hle.

A ṭha zawk
Chelsea hi season bul an ṭan fuh loh vanga Thomas Tuchel bantu kha an ni. Graham Potter an neih hnuah hmasawn deuh mah se, defender pawimawh Reece James leh Ben Chilwell bakah midfielder khaipa N'Golo Kante tel loa khel an ni bawk.

Arsenal erawh beisei phak baka season hmang mektu an ni a, defender ball thiam Oleksandr Zinchenko hliam a dam tawh, an ṭhat dan berin an inrem thei. Inrintawkna sang tak nen Stamford Bridge an lut, a tir aṭangin a phur a, inkhel pawh an thunun.

Mualneitu Chelsea lamin goal khung ai chuan a venhim an ngai pawimawh a, an khingpui tihsual kar laka vuak let chu an tum ber a ni. Gabriel Jesus a tal na viau a, mahse amah ang bawka Brazilian player, tawnhriat ngah bawk Thiago Silva a paltlang thei lo.

Gabriel Martinelli-a cross chu Jesus-a'n tlemin a tauh phak lo a, defender Ben White pawhin goal ban hrulah a pet liam. Potter-a'n tlarhnung a remphui ṭha a, nidanga goal nawr nasa ṭhin Marc Cucurella pawh a che chhuak meuh lo, a hna ber chu Bukayo Saka ven a ni.

Uluk taka an inrem karah Chelsea an chesual. Saka-a corner pet chu William Saliba-a'n tauh tur ang takin a awm a, tauh fuh loin ball hi a tlang. Goal hmaa ding Cucurella-a'n Granit Xhaka kuah uluk viau mah se ball an khawih fuh lo a, hnai zetah Gabriel-a'n a khung.

Auba an dahṭha
Pierre-Emerick Aubameyang hi Arsenal player man to ber a ni ṭhin a, captain armband hial pawh a hreng tawh. Mahse, coach Arteta nen an inmil lo, nungchang ṭha lo vangin Barcelona lamah an hralh a nih kha - Catalan club a zawm hnu hian Spanish manager hi a bei zui.

Chelsea lamah Auba a lo kir a, London club a zawm avangin boruak pawh a awm zui. Gabonese striker hian chiang zetin Ben White a tlawh lui a, yellow card chauh a hmu kha a vannei - a ball chan apiangin Gunners ṭantuten an au el nasa hle.

Striker goal khung thei bik ni mah se Saliba leh a ṭhianten an dah ṭha hmak, khelmualah minute 64 hun a hman chhungin vawi riat bak ball a tawk lo. Gabriel-a'n a hmaah a goal khung a lawm khum bawk - Auba tan zan lungngaihthlak a ni, thawh leh erawh a tum ngei ang.

Club lian an la tum lo a lawm, tih chu Arsenal dinhmun san chhanah an puh ṭhin. Mahse, tunah zet chuan Liverpool, Tottenham Hotspur leh Chelsea an hneh ta, player naupang rual tak kawl khawm chungin North London club hian champion an sawi ngam ṭan ta.

Chelsea erawhin champion an sawi ngam rih lo, an coach an chhuhsak tak Brighton & Hove Albion hnuaiah an awm mek a, beisei neih san ngam a harsa rih ang. Chutihrualin an insiamṭha a nih chuan Arsenal pawtthla turin hun an la ngah tawk.