Liverpool an tho ve leh ta!

Nottingham Forest leh Leeds United laka a zawna an tlawm hnuah Liverpool an tho ve leh ta a, Jurgen Klopp-a team hian an thiam an la theihnghilh lo tih pholangin, Tottenham Hotspur chu khualmualah 2-1 in an hneh.

Liverpool tan Mohamed Salah chuan first half chhungin goal hnih a khung a, player class bik a ni tih a pholang leh ta - minute 11-naah Darwin Nunez-a siamsak chu tawih zetin a khung a, Eric Dier tihsual zarzoin minute 40-naah talbuai hauh loin a khung leh bawk.

Spurs khelmualah Reds hi awlsam takin an chak dawn niin a lang hman. Mahse, minute 70-naah Harry Kane chuan si phurh a rawn sut ṭhen a, London club an phur thar. Mahse, Liverpool tlarhnung an ṭang tlang a, chak an phu rualin an vannei tel.

Tottenham tan Ivan Perisic chuan woodwork a tih per a, Trent Alexander-Arnold-a'n Ryan Sessegnon a tihtluk avanga penalty a chawi lo kha a vannei takzet bawk.

Mahse, Liverpool tan lawmna tur a tam zawk - season ṭantira sawisel tawk Salah a la rintlak reng a, inelna hrang hranga a match hnuhnung 11-ah goal 12 a khung leh tawh a, tun season-a match 20 a khelhah goal 14 khungin, assist vawi nga a nei.

Reds manager Jurgen Klopp chuan, "Season a ṭan ṭha lo kan ti chungin Europe-a chance siam hnem ber pawl a ni tho a, striker chunga thleng ve ṭhin angrengin a chance a chhawr lawk lo.

"Mahse, a career hi kan la thlirkir ang a, khawvela striker ṭha ber pawl a ni, tih an hria ang. Zanina ka lawmna ber chu goal hnih a khung a, team tana a khel bawk kha a ni," a ti.

Nunez-a'n goal khung lo mah se a thawkrim a, Spurs tlarhnung tan a hnawksak reng. Ibrahima Konate lo kir hnuah Liverpool tlarhnung a nghet sawt a, goalkeeper Alisson a ṭangkai reng bawk - Reds hian World Cup hmain league-ah Southampton an la hmachhawn dawn.