A hma aia ṭha zel ka duh - Lianzuala

Mumbai City forward Lallianzuala Chhangte chuan Pathianni zan khan Indian Super League-ah Mumbai City tan goal ropui bik a khung a, ATK Mohun Bagan nen a team hi 2-2 in an inhnehtawk.

Islanders (Mumbai sawina) hian Lianzuala leh Rostyn Griffiths hmangin vawi hnih ngawt hma an hruai a, mahse, Bagan hian Mehtab Singh (own goal) leh Carl McHugh hmangin an chhanglet ve ve a, chak zawk an awm lo.

Tun season-a league match nga a khelh aṭanga a goal hnihna khungtu Lianzuala chuan, "Pathian zarah ka khung ve hlauh a, a lut lo emaw ka ti zawk hial - ka lawm khawp mai. Season hmasa aia ṭha zela khelh ka duh a, Durand Cup-a ka goal khung (7 goals) aia tam khung ka duh. Theihtawp ka chhuah zel ang," tiin Vanglaini a hrilh.

Lunglei tlangval chuan sawi zawmin, "Pathian zarah team leh mimal ang pawhin kan khel ṭha tawlh tawlhin ka hria a, inrintawkna pawh ka nei leh viau tawh. Kan chhunzawm zel chuan season duhawm tak kan hman ka ring a, kan chesual a nih loh chuan playoff khelh beiseina pawh a lian hle," a ti.

Mumbai tan Lianzuala bakah Lalengmawia Ralte (Apuia) chuan inkhel bul a ṭan a, Mohun Bagan tan Lalrinliana Hnamte (Terina) chu bench aṭangin a lut bawk - ISL hi nizan leh zaninah inkhel a awm lo.